Ռեկորդային 250 օր ծովում անցկացնելուց հետո ամերիկյան USS Abraham Lincoln ավիակիրը ժամանել է Թաիլանդ
1 րոպեի ընթերցում
Ծովում ռեկորդային 250 օր անցկացնելուց հետո և առանց որևէ նավահանգիստ մտնելու՝ USS Abraham Lincoln ատոմային ավիակիրը վերջապես կայանել է Թաիլանդում՝ անձնակազմի շուրջ 5000 անդամներին տալով խիստ անհրաժեշտ հանգստի հնարավորություն։ Այդ մասին տեղեկացնում է «Արմենպրես»-ը՝ վկայակոչելով BBC-ին։
Նավը խարիսխ է գցել Պատայա առողջարանային քաղաքի մոտակայքում, որը հայտնի է իր աշխույժ գիշերային կյանքով։ Այդ վայրը նաև մեծ պատմական նշանակություն ունի Միացյալ Նահանգների համար, քանի որ Վիետնամի պատերազմի տարիներին հարյուր հազարավոր ամերիկացի զինծառայողներ այցելել են այստեղ՝ հանգստանալու և ժամանակ անցկացնելու նպատակով։
Հենց նրանց շնորհիվ այդ քնկոտ ձկնորսական ավանը դարձավ աշխարհի ամենահայտնի և եռուզեռով լի քաղաքներից մեկը՝ մի վայր, որտեղ ամերիկացի զինվորականների պնդմամբ՝ իշխում է անդադար խնջույքների մթնոլորտը։