2 րոպեի ընթերցում
Գեղարքունիքի մարզի Սևան քաղաքում ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում այս օրերին սկսվել և ընթանում են Ելենովկա, Բարեկամություն, Աշոտ Երկաթ փողոցների հիմնանորոգման աշխատանքները:
Ինչպես «Արմենպրես»-ին տեղեկացրին Սևանի համայնքապետարանի աշխատակազմից,
660 գծամետր տարածք ընդգրկող փողոցներում այժմ ընթանում են ենթածրագրերով նախատեսված շինարարական աշխատանքների տարբեր փուլերը:
Ելենովկա փողոցի հիմնանորոգման համար հատկացվել է 53 միլիոն 572 հազար 700 դրամ, Բարեկամություն փողոցի հիմնանորոգման համար՝ 66 միլիոն 592 հազար 620 դրամ, Աշոտ Երկաթ փողոցի հիմնանորոգման համար՝ 111միլիոն 312 հազար 680 ՀՀ դրամ՝ կառավարություն-համայնք 50-ական տոկոս համաֆինանսավորմամբ:
Շինաշխատանքների կապալառու կազմակերպությունը «Ճան Շին» ՍՊԸ-ն է:
«Արդյունքում ևս երեք փողոց կդառնա ներկայանալի, համրարավետ ու անվտանգ՝ լրացնելով ճանապարհաշինական ենթածրագրերի շարքը:
Ճանապարհաշինական այս ծրագրի շրջանակներում արդեն իսկ ասֆալտապատվել են Սևան քաղաքի Խաղաղության, Բաբաջանյան և Կոմիտաս փողոցները:
Այս փողոցներում, որոնք գտնվում են քաղաքի կենտրոնական և բանուկ հատվածներից առավել հեռու, տասնամյակներ շարունակ չեն իրականացվել ասֆալտապատման աշխատանքներ:
2025 թվականին հաստատված ճանապարհաշինական սուբվենցիոն ծրագրով հերթը հասավ նաև «հեռավոր» փողոցներին, որոնք օրեցօր ստանում են բարեկարգ և ներկայանալի տեսք»,-ներկայացրին Սևանի համայնքապետարանի աշխատակազմից: