Գյումրիի քաղաքային իշխանությունների համար բնակարանաշինությունն առաջնահերթություն է

Գյումրիի քաղաքային իշխանությունները համայնքի զարգացման օրակարգում առաջնահերթ են համարում բնակարանաշինության ակտիվացումը, որի ուղղությամբ քաղաքապետարանն արդեն ունի պատրաստի նախագծեր։ «Արմենպրես»-ի փոխանցմամբ՝ Գյումրիի քաղաքապետի պարտականությունները կատարող Ավետիս Առաքելյանը լրագրողների հետ հանդիպման ընթացքում ներկայացրել է քաղաքի առաջնահերթ խնդիրներն ու դրանց լուծմանն ուղղված ծրագրերը, որոնք վերջին շրջանում հանրային քննարկումների կենտրոնում էին։

Բնակարանային խնդրի լուծման նպատակով քաղաքապետարանը նախատեսում է իրականացնել սոցիալական բնակարանաշինության մի շարք ծրագրեր։ Մասնավորապես, համայնքային բյուջեի միջոցներով հիմնանորոգվելու է Վարդ Բաղ թաղամասում գտնվող նախկին Ռադիոգործարանի հանրակացարանային շենքերից մեկը։ Վերակառուցումից հետո այնտեղ ստեղծված սոցիալական բնակարանները կհատկացվեն տնակներում բնակվող ընտանիքներին։

Բացի այդ, նույն թաղամասում գտնվող համայնքային ենթակայության 14 բնակարանների վերանորոգման շինարարական մրցույթն արդեն անցկացվել է, և աշխատանքներն ընթանում են։ Նորոգումից հետո դրանք ևս որպես սոցիալական բնակարաններ կհանձնվեն տնակաբնակ գյումրեցիներին։

Սոցիալական բնակարանաշինության ևս մեկ խոշոր ծրագիր իրականացվում է «Փարոս» հիմնադրամի հետ համատեղ՝ Լիսինյան 15 հասցեում։ ՀՀ կառավարության որոշմամբ տարածքը տրամադրվել է «Փարոս» հիմնադրամին, որը շուրջ 1,2 միլիոն ԱՄՆ դոլար ընդհանուր բյուջեով նախատեսում է կառուցել 27 սոցիալական բնակարան։

Ավետիս Առաքելյանի խոսքով՝ բոլոր ծրագրերը գտնվում են մշտական վերահսկողության ներքո, և դրանց իրականացումը կնպաստի տարիներով կուտակված բնակարանային և սոցիալական խնդիրների լուծմանը։