Ախպրաձորում 2018-2025 թթ-ին 146 միլիոն 700 հազար դրամ ներդրմամբ իրականացվել է սոցիալ-տնտեսական նշանակության 5 ծրագիր
1 րոպեի ընթերցում
Գեղարքունիքի մարզի Վարդենիս համայնքի Ախպրաձոր գյուղում 2018-2025 թվականներին սուբվենցիոն ու պետական ծրագրերի շրջանակներում սոցիալ-տնտեսական և կենսական նշանակության 5 ծրագիր է իրականացվել, որոնց ուղղությամբ կատարված կապիտալ ներդրումները կազմել են 146 միլիոն 700 հազար դրամ։
«Արմենպրես»-ին Վարդենիսի համայնքապետարանից տեղեկացրին, որ իրականացված ծրագրերից 4-ը սուբվենցիոն են՝ 86 միլիոն 700 հազար դրամ արժեքով, և մեկը՝ պետական՝ 60 միլիոն դրամ արժեքով։
Իրականացված ծրագրերի արդյունքում 2018-2025 թվականներին Ախպրաձորում կառուցվել է 3600 մետր խմելու, 450 մետր ոռոգման ջրատար, 3300 մետր արտաքին լուսավորության ցանց, ասֆալտապատվել է 500 մետր ներհամայնքային նշանակության ճանապարհ, կոպճապատվել է Մաքենիս-Ախպրաձոր մարզային նշանակության ավտոճանապարհի 3 կիլոմետր հատվածը։
Ճանապարհաշինական աշխատանքներն իրականացվել են պետական ծրագրի շրջանակներում։