2 րոպեի ընթերցում
Իսրայելի պաշտպանության բանակը նոր հարվածներ է հասցրել Լիբանանի հարավում՝ նշելով, որ դա կատարվում է«Հեզբոլլահ» շարժման կողմից հրադադարի համաձայնագրի խախտումներին ի պատասխան։ «Արմենպրես»-ի փոխանցմամբ՝ այս մասին Telegram-ում հաղորդագրություն է տարածել ԻՊԲ մամուլի ծառայությունը։
Ըստ ԻՊԲ-ի՝ հարձակման է ենթարկվել «Հեզբոլլահ»-ի առնվազն 10 ենթակառուցվածքային օբյեկտ՝ «ի պատասխան «Հեզբոլլահ»-ի կողմից համաձայնագրի շարունակվող խախտումների և (խմբ.՝ Հարավային Լիբանանի) անվտանգության գոտում ԻՊԲ զինծառայողների վրա հարձակումների»։
«Իսրայելի պաշտպանության բանակը կշարունակի միջոցներ ձեռնարկել իր զինծառայողների և իսրայելացի խաղաղ բնակիչների նկատմամբ ցանկացած սպառնալիքի կանխման համար», - ասվում է հայտարարության մեջ:
Ավելի վաղ Իսրայելի պաշտպանության նախարարը հայտարարել էր, որ երկրի զինված ուժերն առայժմ կմնան Լիբանանի, Սիրիայի և Գազայի հատվածի, այսպես կոչված, «անվտանգության գոտիներում»: Չնայած Իսրայելի, Լիբանանի և ԱՄՆ-ի միջև օրերս շրջանակային համաձայնագրի ստորագրմանը, Լիբանանում զոհերի թիվը շարունակում է աճել: Երկրում մարտի 2-ից շարունակվող իսրայելական հարվածների զոհերի թիվը հասել է շուրջ 4300-ի: