Հայաստանը վերջին տարիներին կոռուպցիայի դեմ պայքարն ամրապնդող մի շարք բարեփոխումներ է ձեռնարկել․ Հաննա Յունկեր
2 րոպեի ընթերցում
Եվրոպայի խորհրդի անվտանգության, բարեվարքության և իրավունքի գերակայության տնօրինության ղեկավար Հաննա Յունկերի բնորոշմամբ՝ Հայաստանը վերջին տարիներին ձեռնարկել է մի շարք բարեփոխումներ՝ ուղղված կոռուպցիայի և փողերի լվացման դեմ պայքարի շրջանակներն ամրապնդելուն։
«Արմենպրես»-ի հաղորդմամբ՝ Հաննա Յունկերն այդ մասին ասել է Երևանում անցկացվող «Եվրոպական դատախազների երկխոսության հայկական հարթակ» երկօրյա միջոցառման բացման արարողության ժամանակ ունեցած ելույթում։
ԵԽ պաշտոնյան պատահական չի համարել այն հանգամանքը, որ Հայաստանը վերջին տարիներին հյուրընկալում է այս համաժողովը, քանի որ ՀՀ ղեկավարությունը մեծ ուշադրություն է դարձնում երկրում արդարության, արդարադատության հաստատմանը, ինչպես նաև կոռուպցիայի դեմ պայքարին։
«Հայաստանը ձեռնարկել է մի շարք բարեփոխումներ՝ կոռուպցիայի դեմ պայքարի և փողերի լվացման դեմ պայքարի շրջանակները ամրապնդելու համար, ինչպես արտացոլված է GRECO-ի (Եվրոպայի խորհրդի կոռուպցիայի դեմ պետությունների խումբ) և այլ կառույցների զեկույցներում։ Դրանցում ճանաչվել են Հայաստանի առաջընթացը և շարունակական ջանքերը՝ միաժամանակ մշակելով առաջարկություններ, որոնք ուղղված են ինստիտուտների ամրապնդմանը»,-ընդգծել է Հաննա Յունկերը։