Իրանը չի երաշխավորում այն ​​նավերի անվտանգությունը, որոնք որոշում են ինքնուրույն անցնել Հորմուզի նեղուցով

Այն նավերը, որոնք Հորմուզի նեղուցով ընթանում են առանց Իրանի հետ համաձայնեցման, չեն ստանա Թեհրանի երաշխիքները անվտանգ նավարկության համար: «Արմենպրես»-ի փոխանցմամբ՝ այս մասին X հարթակում գրել է Իրանի արտաքին գործերի փոխնախարար Քազեմ Ղարիբաբադին։

«Հորմուզի նեղուցով անվտանգ անցումը չի երաշխավորվում, եթե պայմանավորվածություններն անորոշ են, իրականացվում են զուգահեռ երթուղիներ կամ որոշումներ են կայացվում՝ առանց հաշվի առնելու Իրանի նկատառումները՝ որպես ափամերձ պետության։ Ցանկացած վստահելի շրջանակ պետք է հիմնված լինի Իրանի հետ համակարգման և Իսլամաբադի փոխըմբռնման հուշագրի հինգերորդ կետի վրա», - գրել է նա։

Ղարիբաբադին նշել է, որ ինքնուրույն գործողությունները նաև կարող են հանգեցնել զուգահեռ երթուղու աշխատանքի դադարեցման:

Հունիսի 22-ին ՄԱԿ-ի Միջազգային ծովային կազմակերպությունը հայտարարել էր 11 000 նավաստիների տարհանում սկսելու մասին, որոնք Պարսից ծոցում դժվարին վիճակում էին հայտնվել Հորմուզի նեղուդի փակման պատճառով։ Կազմակերպության գնահատմամբ՝ այնտեղ գտնվող մոտավորապես 600 նավի անձնակազմերի տարհանման համար մի քանի շաբաթ կպահանջվի։ Հունիսի 24-ին հաղորդվել է, որ Օմանի կառավարությունը, Միջազգային ծովային կազմակերպության հետ միասին, կազմակերպում է Հորմուզի նեղուցով նավերի անցման երթուղի Օմանի ջրերով։

Իսլամական հեղափոխության պահապանների կորպուսի (ԻՀՊԿ) ռազմածովային ուժերը հունիսի 24-ին հաստատել են, որ հայտարարվել է Հորմուզի նեղուցով նոր տարանցիկ երթուղու մասին՝ «առանց Իրանի հետ համաձայնեցնելու կամ նրան ծանուցելու»։

Այնուհետև Հորմուզի նեղուցում բեռնանավերից մեկը հայտնեց արկով հարձակման ենթարկվելու մասին։

Միջազգային ծովային կազմակերպությունը միջադեպից հետո դադարեցրել է Հորմուզի նեղուցով նավերի ուղեկցման գործողությունը։