1 րոպեի ընթերցում
Թուրքիայի արտաքին գործերի նախարար Հաքան Ֆիդանը հայտարարել է, որ Իրանի և Միացյալ Նահանգների միջև հակամարտության կարգավորմանն ուղղված բանակցությունների ընթացքում կողմերը կարող են բախվել լուրջ դժվարությունների։
Ինչպես հաղորդում է «Արմենպրես»֊ը, այս մասին հայտնում են թուրքական ԶԼՄ֊ները, հղում անելով` Al Jazeera-ին։ Ֆիդանի խոսքով՝ կողմերը դեռ պետք է լուծեն մի շարք բարդ հարցեր, նախքան համաձայնության հասնելը։
«Սրանք կարևոր խնդիրներ են։ Հնարավոր է՝ տեխնիկական հարցերի շուրջ համաձայնության հասնելը բարդ առաջադրանք լինի։ Ժամանակ առ ժամանակ, հավանաբար, կտեսնենք, որ կողմերը փակուղի են մտել։ Պետք է պատրաստ լինել դրան»,- ասել է Թուրքիայի արտգործնախարարը։
Ֆիդանը նաև մտահոգություն է հայտնել, որ Իսրայելը կարող է փորձել խոչընդոտել բանակցային գործընթացը։
«Իսրայելն իր հնարավորությանը կսպասի։ Այն պատրաստ է խափանել բանակցային գործընթացը, հենց որ տեսնի դրա հնարավորությունը»,- նշել է Թուրքիայի արտաքին քաղաքական գերատեսչության ղեկավարը։