Կարմիրգյուղում 2018-2025 թթ-ին իրականացված սոցիալ-տնտեսական նշանակության 13 ծրագրի համար ներդրվել է 1 միլիարդ 133 միլիոն 825 հազար դրամ
2 րոպեի ընթերցում
Գեղարքունիքի մարզի Գավառ համայնքի Կարմիրգյուղ գյուղում 2018-2025 թվականների ընթացքում սուբվենցիոն և պետական ծրագրերի շրջանակներում իրականացվել է սոցիալ-տնտեսական և կենսական նշանակության 12 ծրագիր, որոնց ուղղությամբ կատարված կապիտալ ներդրումները կազմել են 1 միլիարդ 133 միլիոն 825 հազար դրամ։
Ինչպես «Արմենպրես»-ին տեղեկացրին Գավառի համայնքապետարանից, ծրագրերից 10-ը սուբվենցիոն են՝ 462 միլիոն 980 հազար դրամ ընդհանուր արժեքով, և երկուսը՝ պետական՝ 670 միլիոն 845 հազար դրամ ընդհանուր արժեքով։
Իրականացված ծրագրերի արդյունքում 2018-2025 թվականների ընթացքում Կարմիրգյուղում կառուցվել է 9500 մետր արտաքին լուսավորության ցանց, 8700 մետր խմելու ջրատար ներքին ցանց, 4000 մետր ոռոգման և ջրահեռացման ցանց, Գավառի բնության և պատմության հուշարձանների գովազդային վահանակներ կրող ավտոսպասարկման կանգառ, հիմնանորոգվել է 5729 մետր ներհամայնքային նշանակության ճանապարհ, վերանորոգվել է թիվ 2 միջնակարգ դպրոցը։
Կարմիրգյուղի թիվ 2 միջնակարգ դպրոցը վերանորոգվել է պետական ծրագրով՝ «300 դպրոց, 500 մանկապարտեզ» ծրագրի շրջանակներում, պետբյուջեից հատկացված միջոցներով՝ 387 միլիոն 845 հազար դրամ պայմանագրային արժեքով։
Պետական մեկ այլ ծրագրով էլ Հայաստանի տարածքային զարգացման հիմնադրամի պատվիրատվությամբ Կարմիրգյուղում կառուցվել է 8,7 կիլոմետր երկարության խմելու ջրատար ներքին ցանց՝ շուրջ 283 միլիոն դրամ պայմանագրային արժեքով։