2 րոպեի ընթերցում
Գեղարքունիքի մարզի Գավառ համայնքի Սարուխան գյուղում 2018-2025 թվականների ընթացքում սուբվենցիոն և պետական ծրագրերով սոցիալ-տնտեսական ու կենսական նշանակության 20 ծրագիր է իրականացվել, որոնց ուղղությամբ կատարված կապիտալ ներդրումները կազմել են 2 միլիարդ 6 միլիոն 202 հազար 427 դրամ։
Ինչպես «Արմենպրես»-ին տեղեկացրին Գավառի համայնքապետարանից, իրականացված ծրագրերից 17-ը սուբվենցիոն են՝ 784 միլիոն 202 հազար 427 դրամ ընդհանուր արժեքով, և 3-ը՝ պետական՝ 1 միլիարդ 222 միլիոն դրամ ընդհանուր արժեքով։
Իրականացված աշխատանքների արդյունքում Սարուխանում 2018-2025 թվականների ընթացքում կառուցվել է 17000 մետր արտաքին լուսավորության ցանց, 8810 քմ ասֆալտապատ մայթեր, 1780 մետր ջրահեռացման, 2260 մետր ոռոգման, 3150 մետր խմելու ջրատարներ, 1 մանկական խաղահրապարակ, 2 կամուրջ, Գավառի բնության ու պատմության հուշարձանների գովազդային վահանակներ կրող ավտոսպասարկման կանգառ, հիմնանորոգվել է ներհամայնքային ու մարզային նշանակության 6855 մետր ճանապարհ, թիվ 1 մանկապարտեզի շենքը, վերանորոգվել է թիվ 2 միջնակարգ դպրոցը։
Գավառ-Գեղարքունիք մարզային նշանակության ավտոճանապարհի Սարուխանի հատվածը՝ 3610 գծամետր երկարությամբ, 2023-2025 թվականների ընթացքում հիմնանորոգվել է պետական ծրագրով՝ շուրջ 890 միլիոն դրամի ներդրմամբ։
Պետական երկրորդ ծրագրով՝ Հայաստանի տարածքային զարգացման հիմնադրամի պատվիրատվությամբ՝ 92 միլիոն դրամի ներդրմամբ, կառուցվել է 2800 մետր խմելու ջրատարի ներքին ցանց։
Սարուխանի թիվ 2 միջնակարգ դպրոցը վերանորոգվել է պետբյուջեի միջոցներով՝ «300 դպրոց, 500 մանկապարտեզ» ծրագրի շրջանակներում՝ 238 միլիոն դրամ արժեքով։ Շինարարական աշխատանքները մեկնարկել են 2025 թվականի հուլիսին և ավարտվել 2026 թվականի մարտին։