1 րոպեի ընթերցում
Գեղարքունիքի մարզի Մարտունի քաղաքի փողոցները հիմնանորոգվելուց զատ կանաչապատվում են՝ ստանալով ավելի հրապուրիչ, բարեկարգ ու ժամանակակից տեսք։
Ինչպես «Արմենպրես»-ին տեղեկացրին Մարտունիի համայնքապետարանի աշխատակազմից, կանաչապատման աշխատանքները սկսվել են դեռևս ապրիլից։ Աշխատանքների առաջին փուլում 190 գնդաձև ակացիա է տնկվել Երևանյան փողոցում, ևս 120 տույա տեսակի տնկիներ՝ Երևանյան, Մյասնիկյան, Թումանյան, Գ․ Զիրոյան և Շահումյան փողոցներում։ Հաջորդիվ կկանաչապատվի Սայաթ-Նովա փողոցը։
Փողոցների կանաչապատումն իրականացվում է Մարտունիի համայնքապետարանի բյուջեի միջոցներով։
«Կանաչապատում կիրականացվի Մարտունի քաղաքի բոլոր այն փողոցներում, որոնք ընդգրկված են հիմնանորոգման ծրագրերում։ Դրանք կընթանան ինչպես այս, այնպես էլ հաջորդ տարիների ընթացքում՝ մի քանի փուլերով»,-ներկայացրին Մարտունիի համայնքապետարանի աշխատակազմից։