«Հանրապետություն» կուսակցությունը քարոզարշավը շարունակում է Երևանի Քանաքեռ-Զեյթուն վարչական շրջանում

Հայաստանում կայանալիք խորհրդարանական ընտրությունների նախընտրական քարոզարշավի շրջանակներում «Հանրապետություն» կուսակցության ներկայացուցիչները մայիսի 15-ին Երևանի Քանաքեռ-Զեյթուն վարչական շրջանում են։

Կուսակցությունը վարչական շրջանում իր քարոզարշավը սկսել է ժամը 11։00-ից և կշարունակի մինչև ժամը 17։00-ն։

Կուսակցության ներկայացուցիչները մայիսի 14-ին քարոզարշավ էին անցկացրել Երևանի Ավան և Աջափնյակ վարչական շրջաններում։

Բնակիչների հետ հանդիպմանն Արամ Սարգսյանը ելույթ է ունեցել՝ խնդրելով պարտադիր գնալ ընտրությունների և քվեարկել «Հանրապետություն» կուսակցության օգտին։

«Ազգային ժողովում մեր կուսակցության ներկա գտնվելը լրացուցիչ հնարավորություններ է բացելու նաև քաղաքական համատեքստում։ Պատգամավորի մանդատի համար չէ, որ ես ձեր առաջ կանգնած խոսում եմ։ Ես երկու անգամ պատգամավոր եմ ընտրվել և մանդատը չեմ վերցրել։ Ես այս ամեն ինչն ասում եմ այս երկրի ապագայի համար»,- ասել է Սարգսյանը։

Մայիսի 8-ից մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։

«Հանրապետություն» կուսակցության քվեաթերթիկի համարը 11-ն է։ Կուսակցության վարչապետի թեկնածուն Արամ Սարգսյանն է։ Կուսակցությունն ընտրություններին մասնակցում է «Քեզ համար Հայաստան, քեզ համար» կարգախոսով։

Կուսակցությունը ԿԸՀ է ներկայացրել 90 թեկնածուից բաղկացած ցուցակ։