2 րոպեի ընթերցում
Արաբական Միացյալ Էմիրությունները հայտարարել է, որ Հորմուզի նեղուցում հարված է հասցվել իր պետական նավթային ընկերության՝ Adnoc-ի հետ կապված լցանավին: «Արմենպրես»-ի փոխանցմամբ՝ այս մասին հաղորդում է BBC-ն։
ԱՄԷ արտաքին գործերի նախարարությունը հայտարարության մեջ նշել է, որ տուժածներ չկան:
«Այս հարձակումը կոպտորեն խախտում է ՄԱԿ-ի Անվտանգության խորհրդի 2817 բանաձևը, որը հաստատում է նավագնացության ազատության կարևորությունը և մերժում առևտրային նավերի թիրախավորումը կամ միջազգային ծովային ուղիների խափանումը։ Առևտրային նավերի թիրախավորումը և Հորմուզի նեղուցի օգտագործումը որպես տնտեսական հարկադրանքի կամ շանտաժի գործիք ներկայացնում է Իրանի Իսլամական հեղափոխության պահապանների կորպուսի կողմից ծովահենության գործողություններ և անմիջական սպառնալիք է տարածաշրջանի, նրա ժողովուրդների և համաշխարհային էներգետիկ անվտանգության կայունության համար», - հավելել է գերատեսչությունը։
ԱՄԷ-ն կոչ է արել Իրանին դադարեցնել հարձակումը և «ապահովել իր լիակատար հանձնառությունը բոլոր ռազմական գործողությունների անհապաղ դադարեցմանը, ինչպես նաև Հորմուզի նեղուցի լիակատար և անվերապահ վերաբացմանը»։
Ավելի վաղ ԱՄՆ նախագահ Դոնալդ Թրամփը հայտարարել էր, որ մերձավորարևելյան ժամանակով մայիսի 4-ի առավոտյան ԱՄՆ-ն կսկսի հակամարտության պատճառով Հորմուզի նեղուցում արգելափակված նավերի ուղեկցման գործողություն։ Նա սպառնացել էր ուժ կիրառել, եթե «այս մարդասիրական գործընթացը որևէ խոչընդոտի հանդիպի»:
Իրանն իր հերթին հայտարարել էր, որ Հորմուզի նեղուցում նավագնացությանն ԱՄՆ-ի կողմից ցանկացած միջամտություն կդիտարկվի որպես հրադադարի խախտում։ Իրանի զինված ուժերից խոստացել էին հարվածել այն նավերին, որոնք Հորմուզի նեղուց կմտնեն առանց թույլտվության: