1 րոպեի ընթերցում
Երևանի ավագանու առաջիկա նիստի օրակարգային հարցերի շրջանակում նախատեսվում է քննարկման ներկայացնել նաև Կենտրոն վարչական շրջանի Արսեն Ամիրյան փողոցը Պապ թագավորի անունով անվանափոխելու վերաբերյալ նախագիծ։
«Արմենպրես»-ի հաղորդմամբ՝ Երևանի ավագանու որոշման նախագիծը, որը ներկայացրել է «Ազգային առաջընթաց» խմբակցության անդամ Հայկ Գրիգորյանը, հրապարակվել է Երևանի ավագանու ապրիլի 21-ին նախատեսվող նիստի օրակարգում։
Հիմնավորման մեջ նշվում է, որ հայոց պատմության մեջ ամենաերիտասարդ թագավորներից մեկը՝ Պապը, իր կարճաժամկետ գահակալության ընթացքում հասցրեց այնքան և այնպես գործել, որ այսօր արդեն նրա անունը դասվում է հայոց ամենանշանավորների շարքում։
Նախագծով առաջարկվում է Երևան քաղաքի Կենտրոն վարչական շրջանի Արսեն Ամիրյան փողոցն անվանափոխել Պապ թագավորի անվամբ՝ «Պապ թագավորի փողոց»: