Հայաստանն ու Ռուսաստանը ռազմատեխնիկական համագործակցությունը շարունակելու պայմանավորվածություն են ձեռք բերել
1 րոպեի ընթերցում
Հայաստանն ու Ռուսաստանը կշարունակեն իրագործել նախկինում ձեռք բերված պայմանավորվածությունները ռազմատեխնիկական ոլորտում։
«Արմենպրես»-ի հաղորդմամբ՝ այս մասին ճեպազրույցի ընթացքում նշեց ՀՀ վարչապետ Նիկոլ Փաշինյանն՝ անդրադարձ կատարելով Մոսկվայում ապրիլի 1-ին Ռուսաստանի Դաշնության նախագահ Վլադիմիր Պուտինի հետ բանակցությունների արդյունքներով ձեռք բերված պայմանավորվածություններին։
«Մենք Ռուսաստանի հետ ռազմատեխնիկական համագործակցություն ունենք, ունեցել ենք, որն ինչ-որ մի ժամանակ ընդհատվել էր կամ էականորեն կրճատվել էր, և մենք, այո՛, ունենք պայմանավորվածություն, որ նախկինում ձեռք բերված պայմանավորվածություններն իրագործենք»,-մանրամասնեց վարչապետ Նիկոլ Փաշինյանը։
Ավելի վաղ Նիկոլ Փաշինյանը հայտարարել էր, որ արդյունավետ է համարում ՌԴ նախագահ Վլադիմիր Պուտինի հետ ապրիլի 1-ին կայացած հանդիպումը՝ շեշտելով, որ այդ հանդիպման արդյունքներով մի շարք ոլորտներում համագործակցությունն ակտիվացնելու պայմանավորվածություններ են ձեռք բերել, այդ թվում՝ ռազմատեխնիկական ոլորտում։