სომხეთი და რუსეთი სამხედრო-ტექნიკური თანამშრომლობის გაგრძელებაზე შეთანხმდნენ

სომხეთი და რუსეთი სამხედრო-ტექნიკურ სფეროში ადრე მიღწეული შეთანხმებების იმპლემენტაციას გააგრძელებენ.

„არმენპრესის“ ცნობით, ამის შესახებ ბრიფინგზე სომხეთის პრემიერ-მინისტრმა ნიკოლ ფაშინიანმა განაცხადა, როდესაც მოსკოვში 1 აპრილს რუსეთის ფედერაციის პრეზიდენტ ვლადიმერ პუტინთან გამართული მოლაპარაკებების შედეგად მიღწეულ შეთანხმებებს შეეხო.

„ჩვენ რუსეთთან გვაქვს და გვქონდა სამხედრო-ტექნიკური თანამშრომლობა, რომელიც გარკვეულ დროს შეწყდა ან არსებითად შემცირდა და ჩვენ, დიახ, გვაქვს შეთანხმება, რომ ადრე მიღწეული შეთანხმებები განვახორციელოთ“, - განმარტა პრემიერ-მინისტრმა ნიკოლ ფაშინიანმა.

უფრო ადრე ნიკოლ ფაშინიანმა განაცხადა, რომ რუსეთის პრეზიდენტ ვლადიმერ პუტინთან 1 აპრილს გამართულ შეხვედრას შედეგიანად მიიჩნევს. მან ხაზგასმით აღნიშნა, რომ შეხვედრის შედეგად მიღწეულია შეთანხმებები მთელ რიგ სფეროებში, მათ შორის სამხედრო-ტექნიკურ სექტორში თანამშრომლობის გააქტიურების შესახებ.