სომხეთის რესპუბლიკის პრემიერ-მინისტრმა ევროკომისიის გაფართოებისა და აღმოსავლეთ სამეზობლოს საკითხთა გენერალური დირექტორატის ხელმძღვანელი მიიღო

სომხეთის პრემიერ-მინისტრმა ნიკოლ ფაშინიანმა მიიღო დელეგაცია, რომელსაც ევროკომისიის გაფართოებისა და აღმოსავლეთ სამეზობლოს საკითხთა გენერალური დირექტორატის ხელმძღვანელი გერტ იან კუპმანი ხელმძღვანელობდა.

„არმენპრესის“ ცნობით, სომხეთის რესპუბლიკის პრემიერ-მინისტრის აპარატიდან იტყობინებიან, რომ ნიკოლ ფაშინიანმა ხაზი გაუსვა სომხეთ-ევროკავშირის ურთიერთობების თანმიმდევრულ განვითარებას და აღნიშნა, რომ მხარეები აქტიურად ავითარებენ პარტნიორობას ყველა შესაძლო მიმართულებით.

ნიკოლ ფაშინიანმა აღნიშნა, რომ სომხეთის რესპუბლიკის მთავრობა დაინტერესებულია ტრანსპორტის, ენერგეტიკისა და ციფრული ტექნოლოგიების სფეროებში კავშირების გაღრმავებითა და გაფართოებით, აგრეთვე საერთო ეკონომიკური დივერსიფიკაციითა და მედეგობის განმტკიცებით. ქვეყნის ლიდერმა კიდევ ერთხელ გაუსვა ხაზი სომხური პროდუქციის ექსპორტის წახალისებისკენ მიმართულ ევროკავშირის მხარდაჭერას, ისევე როგორც პროგრამების განხორციელებას სომეხი მწარმოებლებისა და ექსპორტიორებისთვის საჭირო ტექნიკური შესაძლებლობების განვითარების მიზნით.

გერტ იან კუპმანმა აღნიშნა, რომ ევროკავშირი მიესალმება სომხეთის რესპუბლიკის მთავრობის რეფორმების ამბიციურ დღის წესრიგს და მზადაა თანმიმდევრულად დაუჭიროს მხარი ამ პროცესს ყველა იმ სფეროში თანამშრომლობის გაფართოებით, რომელიც ხელს უწყობს სომხეთის მდგრად განვითარებას.

თანამოსაუბრეები შეეხნენ სომხეთ-ევროკავშირის ურთიერთობების მიმდინარე ეტაპს, ეკონომიკურ და დარგობრივ თანამშრომლობას, გაციფრულების, ენერგეტიკის, ინფრასტრუქტურის განვითარებისა და დემოკრატიული რეფორმების მიმართულებით მიმდინარე სამუშაოებს.

ასევე განიხილეს რეგიონული უსაფრთხოებისა და სტაბილურობის, რეგიონული სატრანსპორტო კომუნიკაციების განბლოკვისკენ მიმართულ სამუშაოებთან დაკავშირებული საკითხები.