1 րոպեի ընթերցում
Արևմուտքի երկրները երկու ճակատով կանգնած են պատերազմի առջև։ «Արմենպրես»-ի փոխանցմամբ՝ այս մասին հայտարարել է Մեծ Բրիտանիայի վարչապետ Քիր Սթարմերը Sky News հեռուստաալիքի հետ հարցազրույցում։
Սթարմերը գտնվում է Ֆինլանդիայում, որտեղ Հյուսիսային Եվրոպայի դաշնակիցների հետ մասնակցում է Միացյալ էքսպեդիցիոն ուժերի գագաթնաժողովին։
«Այստեղ մենք շեշտը դնում ենք Ուկրաինայում ռուսական ագրեսիայի վրա։ Բայց մենք պետք է ընդունենք, որ պատերազմ է ընթանում երկու ճակատով։ Մի կողմից իրանական հակամարտությունն է, մյուս կողմից՝ շարունակվող ուկրաինական հակամարտությունը», - ասել է Մեծ Բրիտանիայի վարչապետը։
Նա նշել է, որ գագաթնաժողովի քննարկման թեմաներից կլինեն պաշտպանական ծախսերը, պաշտպանական ունակությունները։
Նա նաև հայտնել է, որ թույլատրել է զինվորականներին երկրի տարածքային ջրերում կալանել Ռուսաստանի «ստվերային նավատորմի» կազմի մեջ մտնող նավերը։