2 րոպեի ընթերցում
Դիվանագիտությունը միակ միջոցն է Պարսից ծոցի շրջանում և Մերձավոր Արևելքում հակամարտությունը կարգավորելու գործում: «Արմենպրես»-ի փոխանցմամբ՝ այս մասին EFE գործակալությանը հայտնել է Եվրոպական խորհրդի ղեկավար Անտոնիու Կոշտան։
«Դիվանագիտությունը մարտական գործողությունները զսպելու և Հորմուզի նեղուցում նավագնացության ազատությունը երաշխավորելու միակ միջոցն է», - ասել է նա։
Կոշտան նշել է, որ այս հակամարտությունը դարձել է դրամատիկ պահ և հսկայական մարտահրավեր միջազգային իրավակարգի համար, ինչը հանգեցրել է ԵՄ-ում էներգառեսուրսների գների կտրուկ աճի։ Բացի այդ, նրա խոսքով, այս հակամարտությունը կարող է նաև լուրջ վտանգ ներկայացնել եվրոպական անվտանգության համար, մասնավորապես, միգրացիայի և ահաբեկչական սպառնալիքների ոլորտներում։
Նա հավելել է, որ ԱՄՆ-ն և Իսրայելը որոշում ընդունեցին հարվածել Իրանին առանց դաշնակիցների հետ որևէ նախնական խորհրդակցության։ Կոշտայի խոսքով՝ այս հակամարտությունը մեծ վտանգ է ամբողջ Մերձավոր Արևելքի կայունության համար։
«Երբ մենք զսպվածության, մարտական գործողությունների դադարեցման և դիվանագիտության կոչով դիմում ենք բոլոր կողմերին, մենք նաև հավատում ենք, որ դա որպես երաշխիք կծառայի Հորմուզի նեղուցում նավագնացության ազատության և առևտրի համար», - ընդգծել է Կոշտան։
Իրանի դեմ ամերիկա-իսրայելական հարվածների և Իրանի պատասխան գրոհների ֆոնին Հորմուզի նեղուցով նավագնացությունը գրեթե դադարել է։ Էներգակիրների գինը կտրուկ աճել է, քանի որ այս նեղուցով է անցնում նավթի համաշխարհային մատակարարումների 20%-ը։