367.93
Մարտունի համայնքի ղեկավարը ընդունել և խրախուսել է միջազգային հարթակներում աչքի ընկած մարզիկներին
2 րոպեի ընթերցում
Գեղարքունիքի մարզի Մարտունի համայնքի ղեկավար Հովհաննես Հովեյանը ընդունել և խրախուսել է միջազգային հարթակներում աչքի ընկած մարզիկներին։
«Արմենպրես»-ի թղթակցի Մարտունու համայնքապետարանի աշխատակազմից հայտնեցին, որ համայնքապետը հյուրընկալել է բազկամարտիկ Արման Մրտեյանին և բռնցքամարտիկ Սիմոն Սիմոնյանին, որոնք վերջերս ՀՀ ԿԳՄՍ նախարար Ժաննա Անդրեասյանի կողմից արժանացել են ՀՀ սպորտի վաստակավոր վարպետի պատվաբեր կոչմանը։
Հանդիպմանը ներկա են եղել նաև բռնցքամարտիկ Սիմոն Սիմոնյանի մարզիչներ Գևորգ և Գագիկ Սարգսյանները, Մարտունու մարզադպրոցի տնօրեն Սամվել Մոսեյանը։
Համայնքի ղեկավարը շնորհավորել է մարզիկներին ու նրանց մարզիչներին, հետաքրքրվել նրանց նպատակներով ու անելիքներով։
«Արման Մրտեյանը բազկամարտի Եվրոպայի առաջնությունների 7-ակի ոսկե մեդալակիր է, միջազգային մրցաշարերի բազմակի մրցանակակիր։ Արմանը ծնունդով Զոլաքարից է, ու թեև նա այժմ բնակվում ու աշխատում է մայրաքաղաքում, շարունակում է մնալ Մարտունի համայնքի պարծանքը։ Սիմոն Սիմոնյանը բռնցքամարտի 2024 թվականի Հայաստանի և Եվրոպայի առաջնությունների հաղթող է, բնակվում է հայրենի Ծովինարում և ակտիվորեն պատրաստվում է հաջորդ տարի կայանալիք մեծահասակների առաջնությանը։ Հայաստանի անկախացումից ի վեր Սիմոնը Մարտունու մարզադպրոցի առաջին մարզիկն է, ով ստացել է սպորտի վաստակավոր վարպետի կոչում»,-ներկայացրել է մարզադպրոցի տնօրեն Սամվել Մոսեյանը։
Հովհաննես Հովեյանը բարձր է գնահատել մարզիկների ձեռքբերումները, նշելով, որ նման նվաճումները տարիների քրտնաջան աշխատանքի արդյունք են։ Նա առանձնահատուկ շնորհակալություն է հայտնել մարզիչներին արգասաբեր ու արդյունավետ գործունեության համար։
Հանդիպման ավարտին համայնքի ղեկավարը մարզիկներին հանձնել է շնորհակալագրեր և մաղթել նորանոր հաղթանակներ։
Բաժանորդագրվեք մեր ալիքին Telegram-ում