2 րոպեի ընթերցում
Չինաստանը հարգում է Իրանի «օրինական իրավունքը՝ միջուկային էներգիան օգտագործել խաղաղ նպատակներով», հայտարարել է Չինաստանի արտաքին գործերի նախարարության խոսնակը՝ միաժամանակ կոչ անելով դադարեցնել ռազմական գործողությունները և վերադառնալ բանակցությունների սեղանի շուրջ։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Չինաստանի ԱԳՆ խոսնակ Մաո Նինը մամուլի ասուլիսում նշել է, որ բանակցությունների ընթացքում ԱՄՆ-ի կողմից Իրանին ուղղված հարվածները «խախտում են միջազգային իրավունքը և միջազգային հարաբերությունների հիմնական սկզբունքները»։
«Իրանի միջուկային հարցը, ի վերջո, պետք է վերադառնա քաղաքական և դիվանագիտական կարգավորման հուն», - ասել է խոսնակը։
Դիվանագետին հարց են ուղղել, թե ինչ հնարավոր ազդեցություն կարող են Չինաստանի նավթի մատակարարումների վրա ունենալ ԱՄՆ-ի ռազմական գործողությունները Վենեսուելայում և Իրանում։ Նա նշել է, որ Չինաստանը կձեռնարկի անհրաժեշտ միջոցներն՝ ապահովելու իր սեփական էներգետիկ անվտանգությունը։
«Էներգետիկ անվտանգությունը շատ կարևոր է համաշխարհային տնտեսության համար, և բոլոր կողմերը պետք է ապահովեն կայուն և սահուն էներգամատակարարում», - ասել է նա։
Իրանին Իսրայելի և ԱՄՆ-ի հարվածներից հետո Թեհրանը պատասխան հարվածներ է հասցնում ինչպես Իսրայելին, այնպես էլ տարածաշրջանի երկրներում գտնվող ամերիկյան ռազմակայաններին և էներգետիկ օբյեկտներին։ Իրանը նաև սպառնացել է հարվածել բոլոր նավերին, որոնք անցնում են Հորմուզի նեղուցով։ Համաշխարհային նավթի մատակարարումների 20%-ն անցնում է այս նեղուցով։