Թրամփը պլանավորում է հանդիպել Սի Ծինփինի հետ և քննարկել միջուկային զինաթափումը

ԱՄՆ նախագահ Դոնալդ Թրամփը հայտարարել է, որ պլանավորել է հանդիպում ունենալ Չինաստանի նախագահ Սի Ծինփինի հետ, ինչպես նաև բանակցություններ վարել միջուկային զինաթափման շուրջ։ «Արմենպրես»-ի փոխանցմամբ՝ այս մասին Թրամփը հայտարարել է Տեխասում հանրահավաքից վերադառնալուց հետո լրագրողների հետ զրույցում, որի տեսանյութը տարածել է Magno News-ը։

«Մենք արդեն պլանավորել ենք հանդիպում անցկացնել Չինաստանի նախագահ Սիի հետ, և նշանակվել է հանդիպում միջուկային զինաթափման շուրջ։ Որքան ես հասկանում եմ, դա շատ կարևոր է, հնարավոր է, ամենակարևորը։ Մենք խոսում ենք տարբեր երկրների միջուկազերծման մասին», - հայտարարել է նա «Էնդրյուս» միացյալ բազայում լրագրողների հետ զրույցում։

Նոյեմբերի 18-19-ին Չինաստանում կանցկացվի Ասիա-խաղաղօվկիանոսյան տնտեսական համագործակցության երկրների ղեկավարների գագաթնաժողովը, որին կմասնակցի նաև ԱՄՆ նախագահը։ Գագաթնաժողովի շրջանակում հնարավոր է նաև եռակողմ հանդիպում ԱՄՆ-ի, Չինաստանի և Ռուսաստանի նախագահների միջև։