Թրամփը հայտարարել է, որ Իրանի հետ հակամարտությունը կավարտվի այն ժամանակ, երբ ինքը ցանկանա

ԱՄՆ նախագահ Դոնալդ Թրամփը հայտարարել է, որ Իրանի հետ հակամարտությունը կավարտվի այն ժամանակ, երբ ինքը դա ցանկանա։ «Արմենպրես»-ի փոխանցմամբ՝ այս մասին հաղորդում է CNBC-ն։

«Ինչ-որ մեկն ինձ հարցրեց. «Ե՞րբ կավարտվի Իրանի հետ պատերազմը»։ Ես պատասխանեցի. «Այն ժամանակ, երբ ցանկանամ, որ այն ավարտվի», - ասել է Թրամփը Տեխասում կայացած հանրահավաքի ժամանակ։

Թրամփը հավելել է, որ «դա կլինի շատ արագ, բայց մենք պետք է այն ավարտենք, ինչպես հարկն է»։ Նա նշել է, որ պետք է լինի «լիարժեք հայտարարություն», որ Իրանը երբեք միջուկային զենք չի ունենա։  

Ամերիկյան լրատվամիջոցները վերջին շաբաթներին չեն բացառել Իրանի ուղղությամբ հարվածների վերսկսումը նոյեմբերի 3-ին կայանալիք ԱՄՆ Կոնգրեսի միջանկյալ ընտրություններից հետո։

Հունիսի 18-ի գիշերը ԱՄՆ-ն և Իրանը հուշագիր են ստորագրել, որը նախատեսում էր փետրվարի 28-ին սկսված հակամարտության ավարտ։ Փաստաթուղթը նախատեսում էր, մասնավորապես, Իրանի նկատմամբ սահմանված ԱՄՆ-ի ծովային շրջափակման չեղարկում՝ Թեհրանի կողմից կենսականորեն կարևոր նշանակություն ունեցող Հորմուզի նեղուցը բացելու դիմաց։ Սակայն ավելի ուշ կողմերը դադարեցին կատարել հուշագրի պայմանները։