Մոսկվայում կայացել է Պայծառ Սարիբեկյանի «Հայաստանի համընդհանուր պատմությունը» գրքի շնորհանդեսը
2 րոպեի ընթերցում
Ռուսաստանի Դաշնությունում Հայաստանի Հանրապետության դեսպանատան մշակույթի կենտրոնում կայացել է Պայծառ Սարիբեկյանի «Հայաստանի համընդհանուր պատմությունը» գրքի շնորհանդեսը։
Մոսկվայում «Արմենպրես»-ի թղթակցի փոխանցմամբ՝ բացման խոսքով հանդես է եկել մշակույթի կենտրոնի ղեկավար Վլադիմիր Գաբբեն։
Կարևորելով նախաձեռնությունը՝ նա նշել է, որ գիրքը կարող է դառնալ հիանալի ուղեցույց այն հայ երեխաների և երիտասարդների համար, որոնք մեծանում են հայրենիքից հեռու՝ նպաստելով նրանց ազգային ինքնության պահպանմանն ու պատմական գիտակցության խորացմանը։ Շնորհանդեսը վարել է մշակութաբան, Մոսկվայի պետական լեզվաբանական համալսարանի դասախոս Աշոտ Ավետիսյանը։
Հեղինակի կատարած աշխատանքը բարձր են գնահատել բանասիրական գիտությունների թեկնածու Աիդա Մարանջյանը, ինչպես նաև բանաստեղծ և գրականագետ Ավագ Հովսեփյանը՝ ընդգծելով աշխատության գիտական արժեքն ու կրթադաստիարակչական նշանակությունը։ Երեկոյի ընթացքում հանդես է եկել մշակույթի կենտրոնի մեներգչուհի Ֆլորա Նազարյանը՝ ներկայացնելով երաժշտական կատարումներ։
Շնորհանդեսին ներկա է եղել նաև հայ ժողովրդի լեգենդար զավակ Շավարշ Կարապետյանը։ Միջոցառման ավարտին հյուրերը հնարավորություն են ունեցել ձեռք բերել գիրքը՝ հեղինակի ընծայագրով։