2 րոպեի ընթերցում
Աբու Դաբիում ավարտվել է Հայաստանի Հանրապետության վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը։
«Արմենպրես»-ի հաղոդրմամբ՝ «դեմ առ դեմ» հանդիպմանը նախորդել էր պատվիրակությունների ընդլայնված կազմով հանդիպումը, որին հայկական կողմից մասնակցում էին ՀՀ փոխվարչապետ Մհեր Գրիգորյանը, Անվտանգության խորհրդի քարտուղար Արմեն Գրիգորյանը, Արտաքին գործերի նախարար Արարատ Միրզոյանը, ԱԺ փոխնախագահ Ռուբեն Ռուբինյանը։
Ադրբեջանական կողմից հանդիպմանը մասնակցել են Ադրբեջանի փոխվարչապետ Շահին Մուստաֆաևը, Ադրբեջանի արտաքին գործերի նախարար Ջեյհուն Բայրամովը, Ադրբեջանի նախագահի արտաքին քաղաքական հարցերով օգնական Հիքմեթ Հաջիևը, Ադրբեջանի նախագահի հատուկ հանձնարարություններով ներկայացուցիչ Էլչին Ամիրբայովը։
Նիկոլ Փաշինյանը և Իլհամ Ալիևը Արաբական Միացյալ Էմիրություններ են ժամանել փետրվարի 4-ին՝ ստանալու «Զայեդ» մարդկային եղբայրության 2026 թվականի մրցանակը։
ՀՀ վարչապետ Փաշինյանը ճանաչվել է «Զայեդ» մարդկային եղբայրության 2026 թվականի մրցանակակիր՝ ի նշանավորումն Հայաստանի Հանրապետության ու Ադրբեջանի Հանրապետության միջև խաղաղության հաստատման, տարածաշրջանում համագործակցության և կայունության ապահովման օրակարգը հետևողականորեն առաջ մղելու համար։
Նույն մրցանակին Ադրբեջանի նախագահ Ալիևի արժանանալն ընդգծում է խաղաղության առաջմղման համար համատեղ ջանքերը։