Թբիլիսիում կայացել է Փարաջանովին նվիրված ստեղծագործական մրցույթի ավանդական մրցանակաբաշխությունը
1 րոպեի ընթերցում
Թբիլիսիի Քաղաքային խորհրդի սրահում կայացել է մեծանուն կինոռեժիսոր Սերգեյ Փարաջանովին նվիրված ստեղծագործական մրցույթի ավանդական մրցանակաբաշխությունը։
«Արմենպրես»-ի հաղորդմամբ՝ այս մասին հայտնում է Վրաստանում ՀՀ դեսպանությունը։
Նշվում է, որ միջոցառմանը ողջույնի խոսքով հանդես են եկել Թբիլիսիի սակրեբուլոյի նախագահ Զուրաբ Աբաշիձեն և Վրաստանում ՀՀ դեսպան Աշոտ Սմբատյանը։
«Իր խոսքում ՀՀ դեսպանը կարևորեց մեծ արվեստագետի համաշխարհային մշակութային ժառանգությունը, որը կոչված է գեղագիտության լեզվով ժողովուրդներին և մասնավորապես` հայ ու վրաց ժողովուրդներին միմյանց կապելու բարի գործին»,-ասված է դեսպանության հաղորդագրության մեջ։
ՀՀ դեսպանը շնորհակալություն է հայտնել Թբիլիսիի սակրեբուլոյի ղեկավարությանը` ամենամյա միջոցառումը հյուրընկալելու համար, ինչպես նաև մյուս կազմակերպիչներին` Վիրահայերի միություն հասարակական կազմակերպությանը և վերջինիս ղեկավար Մարի Առաքելովային։