1 րոպեի ընթերցում
Ֆինլանդիայի նախագահ Ալեքսանդր Ստուբը հերքել է ՆԱՏՕ-ի կազմալուծման մասին ենթադրությունները և հայտարարել, որ Եվրոպան ներկայում ստեղծում է նոր, ավելի ուժեղ դաշինք։ Այս մասին «Արմենպրես»-ը տեղեկանում է «Ինտերֆաքս» գործակալությունից:
«Այժմ ստեղծվում է ավելի ուժեղ ՆԱՏՕ, քան դա եղել է Սառը պատերազմի ավարտվելուց ի վեր։ Եվրոպան ունակ է պաշտպանելու իրեն», - Ստուբի խոսքերն է մեջբերել Helsingin Sanomet թերթը։
Թեմային Ֆինլանդիայի նախագահն անդրադարձել է Դավոսում անցկացվող Համաշխարհային տնտեսական համաժողովում «Կարո՞ղ է արդյոք Եվրոպան պաշտպանել իրեն» թեմայով պանելային քննարկման ժամանակ։
«Մենք ստեղծում ենք նոր ՆԱՏՕ, որում Եվրոպան ավելի մեծ պատասխանատվություն կստանձնի», - հայտարարել է նախագահը։
Երբ նրան հարցրել են, թե ով կամ ինչպես կարող է վերացնել վերջին ժամանակներս Գրենլանդիայի շուրջ ստեղծված իրավիճակում առաջացած լարվածությունը, Ստուբն ասել է. «Մարկ Ռյուտեն», ինչը ծիծաղ է առաջացրել ներկաների և անձամբ ՆԱՏՕ-ի գլխավոր քարտուղարի մոտ։