2 րոպեի ընթերցում
ԵՄ-ն կոչ է անում Իրանի իշխանություններին վերականգնել ինտերնետի հասանելիությունը: Ինչպես «Արմենպրես»-ը տեղեկանում է «ՌԻԱ Նովոստի» գործակալությունից, այս մասին հայտարարել է ԵՄ արտաքին քաղաքական ծառայության ներկայացուցիչ Անվար ալ Անունին։
«Մենք համառորեն կոչ ենք անում Իրանի իշխանություններին պահպանել խոսքի ազատության ու խաղաղ հավաքների իրավունքները, ինչպես նաև վերականգնել ինտերնետի հասանելիությունը», - ասել է նա Բրյուսելում կայացած ճեպազրույցի ժամանակ։
ԵՄ ներկայացուցիչը հավելել է, որ Բրյուսելում ուշադիր հետևում են իրադրության զարգացմանը և մտահոգություն են հայտնում այդ առնչությամբ։
Բողոքի ցույցերն Իրանում սկսվել են 2025 թ. դեկտեմբերի վերջին իրանական ռիալի կտրուկ արժեզրկման և հիպերինֆլյացիայի պատճառով։ Սկզբում բողոքի ցույցերի հիմնական թեման դարձել են փոխարժեքի կտրուկ տատանումները և դրանց ազդեցությունը մեծածախ ու մանրածախ գների վրա: Սակայն ավելի ուշ Իրանի մի շարք քաղաքներում բողոքի ցույցերը վերածվել են ոստիկանության հետ բախումների, իսկ կարգախոսները ստացել են քաղաքական բնույթ՝ թիրախավորելով Իրանի ներկայիս քաղաքական համակարգը: Հաղորդվել է զոհերի մասին թե՛ ուժայինների, թե՛ ցուցարարների շրջանում: Տարբեր իրավապաշտպան կազմակերպությունների տվյալներով՝ զոհերի թիվը հասել է 34-ից 45-ի։ Իրանական ԶԼՄ-ները հայտնել են 21 զոհի մասին։ Ցույցերի ֆոնին սահմանափակվել է ինտերնետի հասանելիությունը։