2 րոպեի ընթերցում
Երևանի քաղաքապետ Տիգրան Ավինյանի որոշմամբ՝ Երևանի պատանի հանդիսատեսի թատրոնում լուծարվել է ռեժիսորի հաստիքը։
«Արմենպրես»-ի հաղորդմամբ՝ այս մասին հայտնում է թատրոնի ռեժիսոր, բեմադրիչ, «Արտավազդ» համահայկական թատերական մրցանակի դափնեկիր, Երևան քաղաքի մշակույթի պատվավոր գործիչ, թատերական մանկավարժ Դավիթ Հարությունյանը։
«Ֆեյսբուք»-ի իր պաշտոնական էջում նա գրել է, որ այդ որոշումից հետո իր ստեղծագործական գործունեությունն այդ թատրոնում համարվում է ավարտված։
«Անհերքելի պատմություն և անջնջելի փաստեր են իմ հեղինակած մի շարք ներկայացումները՝ իրականացված ինչպես Երևանի ՊՀԹ-ում, այնպես էլ մայրաքաղաքի, հանրապետության ու սփյուռքի մի շարք այլ թատրոններում (Գ.Սունդուկյանի անվ. թատրոն, «Մետրո» թատրոն, Հալեպի հայկական թատրոն, Հ. Պարոնյանի անվ. երաժշտական կոմեդիայի թատրոն, Վանաձորի Հովհ. Աբելյանի անվ. դրամատիկական թատրոն, Գորիսի Վ. Վաղարշյանի անվ. դրամատիկական թատրոն), նաև թատերականացված միջոցառումներն ու անտրեպրիզային ներկայացումները»,-նշել է նա։
Ռեժիսորն անդրադարձել է իր մի քանի աշխատանքների, որոնք ազգային թատերական որոնումների ծնունդ են` 17 տարի հանդիսատեսին ուղեկցող Վ. Պետրոսյանի «Վերջին ուսուցիչը», Րաֆֆու «Խենթը», Երևանի 2800-ամյակին նվիրված Էմմա Րաֆֆիի (Մարիամ Մանուկյան) «Իուարշայի սուրը», 2017 թ. Գ. Սունդուկյանի անվ. ազգային ակադեմիական թատրոնում բեմադրած «Արծվաբույն» հերոսապատումը (պիեսի հեղինակ՝ Հրաչ Բեգլարյան), համաշխարհային դասական դրամատուրգիայի հանրահայտ ստեղծագործություններից մեկի` Թ. Ուիլյամսի «Կատուն շիկացած տանիքին» պիեսի յուրովի մոտեցմամբ արված բեմադրությունը և մի շարք այլ ներկայացումներ։
«Վերոնշյալ ներկայացումները տարիներ շարունակ կրթել ու դաստիարակել են տասնյակ հազարավոր դպրոցականների և երիտասարդների»,-ընդգծել է Հարությունյանը, որը 2017-2020 թվականներին զբաղեցրել է Երևանի պատանի հանդիսատեսի թատրոնի գեղարվեստական ղեկավարի պաշտոնը։