1 րոպեի ընթերցում
Գեղարքունիքի մարզի Վարդենիս համայնքի Ռաֆիկ Եսայանի անվան քաղաքային մարզադպրոցում անցկացվել է Ռաֆիկ Եսայանի հիշատակին նվիրված հունահռոմեական ըմբշամարտի բաց առաջնություն:
Ինչպես «Արմենպրես»-ին տեղեկացրին Վարդենիսի համայնքապետարանի աշխատակազմից, առաջնությանը ներկա են եղել Վարդենիսի համայնքապետարանի աշխատակիցներ, Ռաֆիկ Եսայանի այրին՝ տիկին Գայանեն, հյուրեր, մարզասերներ։ Հուշամրցաշարին մասնակցել են Վարդենիսի, Գավառի, Նորատուսի, Սևանի, Եղեգնաձորի, Դիլիջանի, Հրազդանի, Ջրվեժի, Մասիսի, Մալաթիայի, Արաբկիրի, Վաղարշապատի,Վեդիի, Քաջարանի և Կապանի թիմերը։
Թիմային հաշվարկով առաջին տեղը գրավել է Ջրվեժի թիմը։ Երկրորդ տեղը զբաղեցրել է Վաղարշապատի թիմը, երրորդ տեղը՝ Վարդենիսի թիմը։
Մրցանակային տեղեր գրաված մարզիկները պարգևատրվել են համապատասխան կարգի պատվոգրերով և մեդալներով, մրցանակային 1-ին տեղ զբաղեցրած մարզիկները՝ գավաթներով:
Մրցաշարի մրցավարական անձնակազմը գլխավորել է ՀՀ Գեղարքունիքի մարզի հունահռոմեական ըմբշամարտի ֆեդերացիայի նախագահ Ռուբիկ Դումոյանը: