ԿԳՄՍ նախարարությունը Գյումրիի կրթական հաստատությունների տնօրեններին նախազգուշացրել է ապահովել անխափան ուսումնական գործընթացը
2 րոպեի ընթերցում
Հայաստանի կրթության, գիտության, մշակույթի և սպորտի նախարարությունը ստացել է ահազանգեր, համաձայն որոնց` Գյումրու որոշ նախադպրոցական ուսումնական հաստատություններում ուսումնական գործընթացը լիարժեք չի կազմակերպվել, երեխաներին ժամանակից շուտ տուն են ուղարկել՝ ծնողներին կամ անձնակազմին հորդորելով մասնակցել հանրահավաքի։
Այդ կապակցությամբ ԿԳՄՍ նախարարությունը հայտարարություն է տարածել.
«Նշված գործողությունները խախտում են երեխաների կրթության իրավունքը, ինչպես նաև կրթության ոլորտը կարգավորող ՀՀ օրենսդրության պահանջները, որոնցով սահմանվում են ուսումնական հաստատություններում կուսակցական, քաղաքական և կրոնական քարոզչության, ինչպես նաև քաղաքական միջոցառումների անցկացման արգելքները»,- «Արմենպրես»-ի փոխանցմամբ՝ հայտարարում են նախարարությունից՝ ընդգծելով, որ տնօրեններն ու աշխատակիցները պետք է դրսևորեն քաղաքական զսպվածություն:
ԿԳՄՍ նախարարությունը նախազգուշացնում է բոլոր կրթական հաստատությունների տնօրեններին՝ ապահովել անխափան ուսումնական գործընթաց և նախատեսում է հաղորդում ներկայացնել իրավապահ մարմիններին` վերոնշյալ ահազանգերի հիման վրա։
Գյումրիի համայնքապետ Վարդան Ղուկասյանը և ևս 7 անձ հոկտեմբերի 20-ին ձերբակալվել են: Հակակոռուպցիոն կոմիտեն հայտնել էր, որ նրանց կալանավորելու որոշում է կայացվել։ Նրանք մեղադրվում են կաշառք պահանջելու և ստանալու մեջ։
Ըստ տարածված լուրերի՝ Գյումրիի մի շարք մանկապարտեզների տնօրեններ երեխաներին ժամանակից շուտ տուն են ուղարկել, իսկ իրենք միացել քաղաքապետարանի առջև տեղի ունեցած հանրահավաքին: