Բրազիլիայի և ԱՄՆ պաշտոնյաները համաձայնել են առևտրային հարցեր քննարկելու համար հանդիպել Վաշինգտոնում
1 րոպեի ընթերցում
Բրազիլիայի արտաքին գործերի նախարար Մաուրո Վիեիրան և ԱՄՆ պետքարտուղար Մարկո Ռուբիոն համաձայնության են եկել Վաշինգտոնում երկու երկրների ներկայացուցիչների հանդիպում անցկացնելու վերաբերյալ՝ առևտրային հարցերը քննարկելու նպատակով:
«Արմենպրես»-ի փոխանցմամբ՝ այս մասին հայտնում է Reuters-ը՝ հղում անելով Բրազիլիայի կառավարությանը:
Նշվել է, որ կողմերը հեռախոսազրույց են ունեցել, որի ընթացքում Ռուբիոն առաջարկել է անձամբ հանդիպել Վիեիրայի հետ՝ Բրազիլիայի և ԱՄՆ-ի միջև հարաբերություններում առաջնային հարցերը քննարկելու համար։
Նախագահ Լուիս Ինասիո Լուլա դա Սիլվան հայտարարել է, որ Ռուբիոյի զանգն իր և նախագահ Դոնալդ Թրամփի միջև օրեր առաջ տեղի ունեցած զրույցի շարունակությունն էր։
Տեղական ռադիոկայանին տված հարցազրույցում Բրազիլիայի նախագահն ասել է, որ զարմացած է Թրամփի հետ զրույցի արդյունքներից: Զրույցի ընթացքում բրազիլական կողմը խնդրել է վերացնել դեպի ԱՄՆ բրազիլական ապրանքների արտահանման մաքսատուրքերը: