2 րոպեի ընթերցում
Ռուսաստանի Դաշնության արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ Մոսկվան հույս ունի շարունակել երկխոսությունը Հայաստանի հետ Հարավային Կովկասում հաղորդակցությունների ապաշրջափակման հարցում։
«Արմենպրես»-ի թղթակցի փոխանցմամբ՝ այս մասին ՌԴ ԱԳՆ պաշտոնյան հայտնել է ամենշաբաթյա ճեպազրույցի ժամանակ՝ անդրադառնալով «Թրամփի ուղի» նախագծի մասին հարցին։
«Թե ինչպես կաշխատի այս երթուղին գործնականում, հնարավոր կլինի հասկանալ նախագծի կոնկրետ մանրամասներին ծանոթանալուց հետո միայն»,-ասել է Զախարովան։
Նա հավելել է, որ անհրաժեշտ է հաշվի առնել մի շարք լրացուցիչ գործոններ. Հայաստանն անդամակցում է ԵԱՏՄ միասնական մաքսային տարածքին, ՌԴ «Ռուսական երկաթուղի»-ի դուստր ձեռնարկությունը՝ «Հարավային Կովկասյան երկաթուղի» ընկերությունը, կառավարում է Հայաստանի երկաթուղային ցանցերը, իսկ ՌԴ սահմանապահները հսկում են այն տարածքը, որտեղով ենթադրաբար կանցնի նշված երթուղին։
Զախարովան նաև հիշեցրել է, որ հաղորդակցությունների և տնտեսական կապերի ապաշրջափակման եռակողմ աշխատանքային խմբի շրջանակում, որի համանախագահներն են Ռուսաստանի, Ադրբեջանի և Հայաստանի փոխվարչապետերը, ձեռք են բերվել կարևոր համաձայնություններ, որոնք այսօր էլ շարունակում են մնալ արդիական։