1 րոպեի ընթերցում
Արթիկի համայնքի հինգ բնակավայր այսուհետ կունենա կանոնավոր ջրամատակարարում։ 2024 թվականի սուբվենցիոն ծրագրի շրջանակում իրականացվում են «Արթիկ համայնքի հինգ բնակավայրերի խմելու ջրի ջրագծերի հիմնանորոգման աշխատանքներ» նախագիծը։
Արթիկի համայնքապետարանից «Արմենպրես»-ին տեղեկացնում են, որ ծրագրով նախատեսվում է փոխարինել հին և մաշված ստորգետնյա խողովակները՝ տեղադրելով նորերը, ինչպես նաև նորացնել դիտահորերն ու օժանդակ դետալները։
Լայնածավալ աշխատանքներն ընթանում են այն գյուղերում, որտեղ տարիներ շարունակ առկա է եղել խմելու ջրի պակաս։ Խոսքը Մեծ Մանթաշ, Արևշատ, Փոքր Մանթաշ, Լեռնակերտ և Պեմզաշեն բնակավայրերի մասին է։
Արթիկի համայնքապետարանից տեղեկացնում են, որ համայնքի ղեկավար Անան Ոսկանյանը, աշխատակազմի պատասխանատուների հետ այցելել է Լեռնակերտ և Պեմզաշեն գյուղեր՝ տեղում հետևելու ջրագծերի վերականգնման աշխատանքներին։ Այդ հատվածները գտնվում են բարձր լեռնային գոտում, որտեղ խմելու ջրի հասանելիությունը հատկապես սահմանափակ է ամռան ամիսներին։
Կարևորելով սուբվենցիոն ծրագրի իրականացումը՝ համայնքի ղեկավարը նշել է, որ նոր ստորգետնյա ջրատարը կապահովի բնակիչների խմելու ջրի կայուն մատակարարումը՝ էապես բարելավելով գյուղերի կենսապայմանները։