1 րոպեի ընթերցում
Պետություն-համայնք համագործակցությամբ Շիրակի մարզի Աշոցք համայնքում իրականացվում են արտաքին լուսավորության ցանցի կառուցման աշխատանքներ։ Աշոցքի համայնքապետարանից «Արմենպրես»-ին տեղեկացնում են, որ սուբվենցիոն ծրագրի շրջանակում իրականացվող աշխատանքների ֆինանսավորման 60 տոկոսը հատկացնում է պետությունը, իսկ մնացած 40 տոկոսը՝ համայնքը։
Լուսավորության ցանցի կառուցման աշխատանքներն արդեն մեկնարկել են համայնքի մի շարք բնակավայրերում՝ Փոքր Սարիար, Կաքավասար, Թավշուտ, Սիզավետ, Զույգաղբյուր, Սալուտ և Արփենի։
Ընդհանուր նախագծի ֆինանսավորման ամենամեծ չափաբաժինը նախատեսված է Զույգաղբյուր բնակավայրի համար։ Բոլոր նշված բնակավայրերում իրականացվելիք աշխատանքների համար նախատեսված ընդհանուր գումարը կազմում է 25 մլն 830 հազար ՀՀ դրամ։
Նախագծի շրջանակում յուրաքանչյուր բնակավայրում աշխատանքների ավարտը նախատեսվում է մինչև 120 օրացուցային օր։