1 րոպեի ընթերցում
Հրազդան գետում անցկացվել է Սևանի ջրային մարզաձևերի դպրոցի նախկին տնօրեն Աշոտ Ավետիսյանի հիշատակին նվիրված ամենամյա հուշամրցաշար։
Ինչպես «Արմենպրես»-ին տեղեկացրին Սևանի համայնքապետարանի աշխատակազմից, անվանի մարզչի հիշատակին նվիրված հուշամրցաշարն անցկացվում է ամեն տարի՝ Հրազդան գետում: Հերթական՝ արդեն 15-րդ հուշամրցաշարն անցկացվել է օգոստոսի 14-ին:
Թիավարության կանոէի և բայդարկայի բաց առաջնության հուշամրցաշարին մասնակցել են կրտսեր և պատանի տարիքի երիտասարդներ Երևանից, ՀՀ մարզերից և Վրաստանից:
Սևանի Ջրային մարզաձևերի դպրոցի նախկին տնօրեն Աշոտ Ավետիսյանի հիշատակին նվիրված բաց առաջնության թիավարության մասնակիցները հաղթահարել են բայդարկա և կանոէ մեկտեղանոց և երկտեղանոց 200 և 500 մետրանոց մրցուղիները:
Հուշամրցաշարին մասնակից և հաղթող ճանաչված մարզիկները պարգևատրվել են պատվոգրերով և մեդալներով:
Աշոտ Ավետիսյանը երկար տարիներ Սևանի ջրային մարզաձևերի դպրոցի տնօրեն է աշխատել: Նրա սաները մասնակցել են աշխարհի ու հանրապետական բազմաթիվ առաջնությունների՝ գրավելով պատվավոր հորիզոնականներ: