Ֆրանսիան վերահաստատել է իր լիակատար աջակցությունը ՀՀ ինքնիշխանությանը և տարածքային ամբողջականությանը

Ֆրանսիայի նախագահ Էմանուել Մակրոնը Հայաստանի վարչապետ Նիկոլ Փաշինյանի հետ հեռախոսազրույցում ողջունել է ԱՄՆ ներգրավվածության շնորհիվ Հայաստանի և Ադրբեջանի միջև հարաբերությունների կարգավորման նպատակով ձեռք բերված համաձայնությունը: 

«Արմենպրես»-ի հաղորդմամբ՝ Մակրոնը հեռախոսազրույցից մանրամասներ է հայտնել X–ի իր միկրոբլոգում: 

«Ես կրկին ողջունեցի Ամերիկայի Միացյալ Նահանգների ներգրավվածության շնորհիվ Հայաստանի և Ադրբեջանի միջև հարաբերությունների կարգավորման նպատակով ձեռք բերված համաձայնությունը»,–նշել է Մակրոնը:

Նա հույս է հայտնել, որ դա շուտով կհանգեցնի երկու կողմերի շահերը հարգող խաղաղության համաձայնագրի ստորագրմանն ու վավերացմանը։

«Այս համատեքստում ես վերահաստատեցի իմ լիակատար աջակցությունը Հայաստանի ինքնիշխանությանը և տարածքային ամբողջականությանը, ինչպես նաև Ֆրանսիայի հանձնառությունը Հարավային Կովկասում խաղաղության և բարգավաճման հարցում»,–ընդգծել է Ֆրանսիայի նախագահը:

Մակրոնը վերահաստատել է նաև շարունակական ջանքերին, այդ թվում՝ փոխհարաբերությունների ամրապնդման ջանքերին աջակցելու և նպաստելու Ֆրանսիայի պատրաստակամությունը՝ տարածաշրջանային բոլոր դերակատարների և գործընկերների հետ համագործակցությամբ։

Երկու երկրների ղեկավարները նաև պայմանավորվել են շարունակել խորացնել երկկողմ հարաբերությունները բոլոր ոլորտներում:

Je viens de m’entretenir avec le Premier ministre @NikolPashinyan à la suite de la réunion qui s'est tenue à Washington le 8 août dernier.

J’ai de nouveau salué l’accord conclu, grâce à l’engagement des Etats-Unis, entre l’Arménie et l’Azerbaïdjan…

— Emmanuel Macron (@EmmanuelMacron) August 11, 2025