Վարչապետը խարույկի շուրջ զրուցել է դպրոցականների թիմային խճուղավազքի մրցաշարի մասնակիցների հետ
2 րոպեի ընթերցում
Վարչապետ Նիկոլ Փաշինյանը Տավուշի մարզում՝ Դիլիջանի Պարզ լճի տարածքում, հանդիպել է «ՀՀ վարչապետի գավաթ» դպրոցականների թիմային խճուղավազքի մրցաշարի մասնակիցներին և խարույկի շուրջ զրուցել նրանց հետ: Չորրորդ անգամ անցկացվող այս մրցաշարի նպատակն է նպաստել դպրոցականների շրջանում վազքի և առողջ ապրելակերպի մասսայականացմանը, ինչպես նաև ֆիզկուլտուրայի և սպորտի քարոզչությանը:
Ինչպես «Արմենպրես»-ին տեղեկացրին ՀՀ վարչապետի աշխատակազմից, վարչապետը ողջունել է մասնակիցներին և շնորհավորել նրանց եզրափակիչ փուլին մասնակցելու հնարավորություն ստանալու առիթով: Նիկոլ Փաշինյանը կարևորել է հանրության, այդ թվում՝ դպրոցականների շրջանում առողջ ապրելակերպի խթանման անհրաժեշտությունը և ընդգծել, որ այդ նպատակին հասնելու ուղղություններից մեկն էլ տարբեր մարզաձևերում սիրողական այս մրցաշարերի անցկացումն է:
«Հանդիպման ընթացքում քննարկվել են նաև մրցաշարի կազմակերպմանը, ձևաչափին վերաբերող հարցեր: Մասնակիցները կիսվել են իրենց տպավորություններով և ընդգծել, որ դպրոցականների շրջանում առկա է այս մրցաշարերին մասնակցելու բավականին մեծ հետաքրքրվածություն: Նրանք շնորհակալություն են հայտնել վարչապետին նման նախաձեռնության համար:
Նիկոլ Փաշինյանը հաջողություն է մաղթել մրցաշարի մասնակիցներին, ինչպես նաև պատասխանել նրանց հետաքրքրող հարցերին»,- ասվում է հաղորդագրության մեջ:
Ըստ աղբյուրի՝ «ՀՀ վարչապետի գավաթ» դպրոցականների թիմային խճուղավազքի մրցաշարը կանցկացվի Դիլիջանի Պարզ լճին հարող տարածքում՝ հունիսի 29-ին: Եզրափակիչ փուլին կմասնակցեն հանրապետության դպրոցների լավագույն թիմերը, որոնք հաղթող են ճանաչվել մարզային և համայնքային փուլերում: Մրցաշարին կմասնակցի 11 թիմ` յուրաքանչյուրի կազմում 7 աշակերտ, որոնք կհաղթահարեն 5000 մետր մրցատարածությունը: