Հայկական իմպրեսիոնիզմի գանձերը կցուցադրվեն Ֆրանսիայում

Ֆրանսիայի հանրահայտ Բարբիզոնի մշակութային կենտրոնում հունիսի 27-ին կբացվի «Հայկական իմպրեսիոնիզմի գույներն ու լույսերը» ծավալուն ցուցահանդեսը, որտեղ կցուցադրվեն Հայկական իմպրեսիոնիզմը ներկայացնող բարձրարժեք գործեր Հայաստանի ազգային պատկերասրահի հավաքածուից:

«Արմենպրես»-ի փոխանցմամբ՝ այս մասին հաղորդագրություն է տարածել Հայաստանի ազգային պատկերասրահը։ 

Միջազգային ցուցահանդեսում ընդգրկված են գլխավորապես 20-րդ դարի առաջին երեք տասնամյակներում ստեղծագործող հեղիկնակների 30-ից ավելի գեղանկարչական աշխատանքներ. մասնավորապես՝ անվանի արվեստագետներ Վարդգես Սուրենյանցի, Եղիշե Թադևոսյանի, Վահրամ Գայֆեճյանի, Կարապետ (Շառլ) Ադամյանի, Մարտիրոս Սարյանի, Սեդրակ Առաքելյանի ստեղծագործությունները:

Ցուցադրության ընթացքում կիրականացվեն մի շարք մշակութային միջոցառումներ և ծրագրեր, ինչպես Ֆրանսիայում, այնպես էլ Հայաստանում:

Ցուցահանդեսի համադրող՝ Հայաստանի ազգային պատկերասրահի տնօրեն Մարինա Հակոբյան:

2022 թ. Հայաստանի ազգային պատկերասրահը անդամակցում է Եվրոպայի խորհրդի «Մշակութային ուղիներ» ծրագրի «Իմպրեսիոնիզմի ուղիներ» նախագծին, որով ընդլայնվում է Հայաստանի ներգրավվածությունը եվրոպական մշակութային համայնապատկերում հայկական մշակույթի հանրահռչակման, միջմշակութային երկխոսության և համատեղ նոր ծրագրերի իրականացման համար: 

«Հայկական իմպրեսիոնիզմի գույներն ու լույսերը» միջազգային ցուցահանդեսն իրականացվում է վերոնշյալ համագործակցության շրջանակներում: