2 րոպեի ընթերցում
ՄԱԿ-ում Իրանի մշտական ներկայացուցչությունը պահանջել է համաշխարհային կազմակերպության Անվտանգության խորհրդի արտակարգ նիստ՝ Իսրայելի գիշերային գրոհի պատճառսվ: Համապատասխան նամակը մշտական ներկայացուցչության ղեկավար Ամիր Սայիդ Իրավանին ուղարկել է Անվտանգության խորհրդի նախագահին: «Արմենպրես»-ի փոխանցմամբ՝ այս մասին հաղորդում է Tasnim գործակալությունը:
«Կատարելով անխոհեմ, անօրինական և կանխամտածված ագրեսիայի գործողություն՝ սիոնիստական վարչակարգը մի շարք համակարգված ռազմական հարձակումներ է իրականացրել Իրանի Իսլամական Հանրապետության միջուկային օբյեկտների և քաղաքացիական ենթակառուցվածքների վրա», - նշված է նամակում, որտեղ հաղորդվում է նիստի պահանջի մասին:
Գիշերն Իսրայելը հարվածներ է հասցրել Իրանի մայրաքաղաք Թեհրանին և նրա շրջակայքին, ինչպես նաև Իրանի այլ քաղաքներին։ Հարվածի թիրախ է դարձել նաև Նաթանզի միջուկային օբյեկետը։ Ավելի վաղ Իսրայելի վարչապետ Բենիամին Նեթանյահուն հայտարարել էր «Վեր հառնող առյուծ» գործողության մեկնարկի մասին, որն ուղղված է Իրանի միջուկային ծրագրի դեմ։ Հարվածների թիրախում են հայտնվել նաև բնակելի շենքեր։ Զոհվել են իրանցի բարձրաստիճան զինվորականներ և միջուկային ոլորտի մասնագետներ։ Իրանը խոստացել է վճռորոշ պատասխան տալ իսրայելական հարվածներին։