ՃՇՀԱՀ-ի ուսանողուհիները հաջողություններ են գրանցել Չինաստանում կայացած «Թվային ինտերակտիվ մեդիա դիզայն» հմտության մրցույթում
1 րոպեի ընթերցում
Ճարտարապետության և շինարարության Հայաստանի ազգային համալսարանի (ՃՇՀԱՀ) ուսանողուհիներ Լուիզա Մկրտչյանը և Արմինե Հակոբյանը մասնակցել են Չինաստանի Գուանչժոու քաղաքում կայացած «Թվային ինտերակտիվ մեդիա դիզայն» հմտության մրցույթին և փայլուն արդյունքներ գրանցել՝ Հայաստան բերելով 2 մեդալ։
Ինչպես «Արմենպրես»-ին տեղեկացրեց ՃՇՀԱՀ֊ի մամուլի քարտուղար Ժասմեն Վիլյանը, մրցույթի արդյունքներով Լուիզա Մկրտչյանը զբաղեցրել է 2-րդ պատվավոր հորիզոնականը՝ արժանանալով արծաթե մեդալի, իսկ Արմինե Հակոբյանը ստացել է գերազանցության մեդալիոն։
Ըստ աղբյուրի՝ մրցույթը համախմբել էր տարբեր երկրներից մասնակիցների՝ ստեղծելով ստեղծագործական մրցակցություն և միջազգային փորձի փոխանակման բացառիկ հնարավորություն։ Մասնակիցների հմտությունը՝ թվային ինտերակտիվ մեդիա դիզայնը, համարվում է նորարարական մասնագիտական ուղղություն, որը նախատեսվում է ներառել WorldSkills 2026-ի պաշտոնական ծրագրում։