2 րոպեի ընթերցում
Երևանի Հովհաննես Թումանյանի թանգարանի նախաձեռնությամբ Մոսկվայում կայացել է «Թումանյանական օրեր» երկօրյա միջոցառումների շարքը։
Մոսկվայում «Արմենպրես»-ի թղթակցի փոխանցմամբ՝ ծրագիրը մեկնարկել է ՌԴ-ում ՀՀ դեսպանատան Մշակույթի կենտրոնում։
Թանգարանի տնօրեն Լուսինե Ղարախանյանը հանդես է եկել «Ճամփորդ հոգի» բանախոսությամբ, որի ընթացքում սլայդի միջոցով ներկայացվել է Թումանյանի ճամփորդությունների քարտեզը, արտացոլվել նրա ճամփորդական մտքերն ու լուսանկարները։
Միջոցառման շրջանակում ներկայացվել է նաև «Թումանյանը և ռուսական գրականությունը» թեմայով դասախոսություն, ցուցադրվել «Նամակներ ռազմաճակատից» ֆիլմը, որտեղ ներկայացված են բանաստեղծի թոռան՝ Վիգեն Թումանյանի՝ ռազմաճակատից գրված նամակները։
Ֆիլմը նվիրված է Հայրենական մեծ պատերազմի 80-ամյակին։ Բարձր գնահատելով այցի նշանակությունը՝ Մշակույթի կենտրոնի ղեկավար Վլադիմիր Գաբբեն իր խոսքում ընդգծել է հայ մեծ գրողի թողած հսկայական գրական ժառանգության արժանի պահպանման և տարածման կարևորությունը, հատկապես սփյուռքահայության շրջանում։ Այդ առթիվ նա կենտրոնի կողմից շնորհակալագիր է հանձնել թանգարանի տնօրենին։
Հաջորդ հանդիպումը կայացել է Ռուսաստանի հայերի միության «Լուսարձակ» կիրակնօրյա դպրոցում։ Ներկայացվել է Թումանյանի կենսագրությունը, ընտանիքի մանրակերտը, այդ համատեքստում անդրադարձ է կատարվել հայկական ավանդական արժեքներին ու ավանդույթներին։
Միջոցառումն ուղեկցվել է անիմացիոն ֆիլմի դիտմամբ և թատերական ներկայացմամբ։ Կիրակնօրյա դպրոցին փոխանցվել են Թումանյանի ստեղծած խաղերը, գրքեր։
Ռուսաստանի հայերի միության կողմից թանգարանին հանձնվել է շնորհակալագիր։ Ամփոփելով երկօրյա այցի արդյունքները՝ թանգարանի տնօրեն Լուսինե Ղարախանյանը նշել է, որ այն արդյունավետ է համարում, քանի որ սփյուռքում հայկական արմատներին հարազատ մնալու համար առաջին հերթին պետք է խոսել հայ դասականների միջոցով ու նրանց թողած պատգամով։
Տնօրենի խոսքով՝ ծրագիրը շարունակական է լինելու։