ՊՎԾ վերահսկողության արդյունքում 68 պաշտոնատար անձի նկատմամբ կիրառվել են կարգապահական պատասխանատվության միջոցներ
3 րոպեի ընթերցում
Պետական վերահսկողական ծառայության կողմից իրականացված վերահսկողության արդյունքում 2024 թվականին 68 պաշտոնատար անձի նկատմամբ կիրառվել են կարգապահական պատասխանատվության միջոցներ:
«Արմենպրես»-ի փոխանցմամբ՝ այս մասին ասաց Պետական վերահսկողական ծառայության ղեկավար Ռոմանոս Պետրոսյանն ԱԺ մշտական հանձնաժողովների համատեղ նիստում 2024թ պետական բյուջեի կատարման արդյունքների վերաբերյալ հաշվետվության ներկայացմանը:
ՊՎԾ–ն 2024 թվականի ընթացքում իրականացրել է ուսումնասիրություններ, մշտադիտարկումներ, վերլուծություններ:
«2024թ. ընթացքում ծառայությունում իրականացվել է 27 ուսումնասիրություն, որոնցից 22–ն ավարտվել են հաշվետվու տարվա ընթացքում, 5–ը տեղափոխվել են այս տարի: Իրականացվել է 159 մշտադիտարկում, որոնցից 119–ն ավարտվել են 2024–ին, 40–ը տեղափոխվել է այս տարի»,–ասաց Պետրոսյանը:
Կատարված ուսումնասիրությունների և մշտադիտարկումների արդյունքում կազմվել է 125 տեղեկանք: Ուսումնասիրությունների և մշտադիտարկումների արդյունքում իրավապահ մարմիններին է ուղարկվել 68 տեղեկանք և տեղեկատվություն, որի հիման վրա նախաձեռնվել է 63 քրեական վարույթ, որոնցից մեկը նաև հանդիսանում է ծառայության պահպանման ծախսերի շրջանակում ծագած իրավահարաբերությունների վիճարկման խնդիր:
Ծառայության պետի խոսքով՝ վերահսկողություն է իրականացվել Պաշտպանության նախարարության, Ներքին գործերի նախարարության, Առողջապահության, Արդարադատության նախարարությունների համակարգերում, Հարկադիր կատարումն ապահովող ծառայությունում, ՊԵԿ–ում, տեսչական մարմիններում և մի շարք այլ ոլորտներ համակարգող լիազոր մարմիններում ու ենթակա պետական մարմիններում:
Մշտադիտարկվել են նաև գնման ընթացակագրերի տեխնիկական բնութագրեր:
«Իրականացված վերահսկողության արդյունքներով՝ 68 պաշտոնատար անձի նկատմամբ կիրառվել են կարգապահական պատասխանատվության միջոցներ: Վերահսկողության արդյունքները սահմանված կարգով զեկուցվել են վարչապետին, իսկ արձանագրված խախտումներին իրավական գնահատական տալու անհրաժեշտության դեպքում դրանց առնչվող նյութերը փոխանցվել են Գլխավոր դատախազությանը»,–ասաց Պետրոսյանը:
Նրա խոսքով՝ իրականացված վերահսկողությունների արդյունքում բացահայտվել են ընդհանուր շուրջ 100 մլրդ դրամի չափով առերևույթ խախտումներ, անհամապատասխանություններ ու շեղումներ:
Պետական բյուջե է վերադարձվել ավելի քան 922 մլն դրամ: