Պատմության և մշակույթի հուշարձանների պահպանության վարչության մասնագետները մշտադիրտարկում են իրականացրել Արագածոտնի և Արմավիրի մարզերի մի շարք հուշարձաններ
2 րոպեի ընթերցում
Հայաստանի կրթության, գիտության, մշակույթի և սպորտի նախարարության միջոցներով վերականգնման աշխատանքներ են կատարվում Արագածոտնի մարզի «Ագարակ» պատմամշակութային արգելոցում, Փարպիի Ծիրանավոր, Բյուրականի Սբ Հովհաննես և Արմավիրի մարզի Թարգմանչաց եկեղեցիներում: Կատարվող աշխատանքների վերահսկողության նպատակով նախարարության Պատմության և մշակույթի հուշարձանների պահպանության վարչության մասնագետներն այցելել են նշված տարածքներ։
Ինչպես «Արմենպրես»-ը տեղեկանում է ԿԳՄՍ նախարարության տարածած հաղորդագրությունից, «Ագարակ» պատմամշակութային արգելոցում շարունակվում են վաղբրոնզեդարյան կացարանների ամրակայման և նորոգման աշխատանքները, սկսվել են նաև ծածկի կառուցման աշխատանքները։
Փարպիի Ծիրանավոր եկեղեցում մեկնարկում են տարածքի բարեկարգման աշխատանքները։ Արմավիրի մարզի Թարգմանչաց եկեղեցում շարունակվում են պատերի ներարկման և թմբուկի վերականգնման աշխատանքները։ Բյուրականի Սբ Հովհաննես եկեղեցու պարսպապատի նորոգման աշխատանքները նույնպես սկսվել են: Մասնագետները քննարկել են վթարային պատի վերականգնման համար անհրաժեշտ քարի ընտրության հարցը:
Վերականգնող կապալառու կազմակերպությունների, տեխնիկական և հեղինակային հսկողություն իրականացնող մասնագետների հետ տեղում քննարկվել է աշխատանքի ընթացքը, ներկայացվել են մասնագիտական դիտողություններ։
Նշված աշխատանքները նախատեսվում են ավարտել 2025 թվականին։