2 րոպեի ընթերցում
Թուրքիայի նախագահ Ռեջեփ Թայիփ Էրդողանն Անկարայում ՆԱՏՕ-ի գլխավոր քարտուղար Մարկ Ռյուտեի հետ բանակցությունների ժամանակ ասել է, որ Թուրքիան ակտիվացրել է ջանքերը՝ վերջ դնելու ռուս-ուկրաինական հակամարտությանը, սակայն նա պնդել է, որ հյուսիսատլանտյան դաշինքը չպետք է լինի հակամարտության կողմ։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել է Թուրքիայի ղեկավարի աշխատակազմը։
Էրդողանը Ռյուտեին ընդունել է նախագահական համալիրում. Հանդիպման ընթացքում քննարկվել են Թուրքիայի և ՆԱՏՕ-ի հարաբերությունները, Ուկրաինայի և Ռուսաստանի միջև հակամարտության շուրջ իրավիճակի զարգացումը, տարածաշրջանային և գլոբալ հարցեր։ Հանդիպման ընթացքում Էրդողանն ասել է, որ Թուրքիան մեծ նշանակություն է տալիս ՆԱՏՕ-ին, և որպես դրա հաստատում՝ Անկարան կրկին կստանձնի Կոսովոյում ՆԱՏՕ-ի ուժերի հրամանատարությունը։
«Նախագահ Էրդողանն ասել է, որ Թուրքիան ակտիվացրել է իր ջանքերը՝ Ուկրաինայի և Ռուսաստանի միջև պատերազմը տևական և արդար խաղաղությամբ ավարտելու համար, որ Թուրքիան բանակցություններ է վարել Ռուսաստանի և Ուկրաինայի նախագահների հետ ու վճռականորեն աջակցում է համապարփակ հրադադարի հաստատմանը։ Թուրքիան պահպանում է այն դիրքորոշումը, որ ՆԱՏՕ-ն չպետք է մաս կազմի այդ պատերազմին, և որ խաղաղության հնարավորությունը չպետք է բաց թողնվի», - ասված է Էրդողանի աշխատակազմի տարածած հաղորդագրության մեջ։