2 րոպեի ընթերցում
Պակիստանցի զինվորականներն ապրիլի լույս 30-ի գիշերը մի քանի անգամ խախտել են հրադադարի ռեժիմը Հնդկաստանի հետ միջազգային սահմանին։ «Արմենպրես»-ի փոխանցմամբ՝ այս մասին հաղորդում է հնդկական ANI գործակալությունը։
Ըստ հրապարակման՝ Ջամու և Քաշմիրի նահանգում գրեթե 7-8 տարվա դադարից հետո բնակիչներն ականատես են եղել հրադադարի ռեժիմի խախտումների մի քանի շրջաններում, այդ թվում՝ Նաուշերայի, Սունդերբանիի և Ախնուրի։ Ախնուրի շրջանի Պարգվալի հատվածում գյուղացիները հայտնել են, որ ուշ գիշերը բազմաթիվ կրակոցներ են լսել։
«Գիշերը 10-ից 12 կրակահերթ է տեղի ունեցել։ Հնդկաստանի բանակը պատասխանել է», - ասել է ANI-ին տեղի բնակիչներից մեկը։
Մեկ այլ բնակիչ նշել է, որ կրակոցներ լսելուց հետո իրենց հրահանգել են դադարեցնել գյուղատնտեսական աշխատանքները և տուն վերադառնալ»։
Հնդկաստանի բանակն իր հերթին հայտարարել է, որ ապրիլի լույս 30-ի գիշերը Պակիստանի բանակը Ջամու և Քաշմիրի նահանգում չհրահրված կրակ է բացել փոքր չափի հրազեններով, որին հնդկական բանակն «արագ և համաչափ» պատասխան է տվել։
Հնդկաստանի և Պակիստանի սահմանային գոտում վերջին շաբաթվա ընթացքում հրադադարի ռեժիմի խախտում է գրանցվում Նյու Դելիի և Իսլամաբադի միջև հարաբերությունների սրման ֆոնին՝ Ջամու և Քաշմիրում տեղի ունեցած ահաբեկչությունից հետո, որի հետևանքով զոհվել է 26 մարդ: