Վրաստանի նախագահը հուսով է, որ Հայաստանի ու Ադրբեջանի միջև խաղաղության համաձայնագիրը կստորագրվի մոտ ապագայում
2 րոպեի ընթերցում
Վրաստանը միանշանակորեն ողջունում է խաղաղության համաձայնագրի շուրջ բանակցությունների ավարտի վերաբերյալ Հայաստանի և Ադրբեջանի հայտարարությունը և հույս ունի, որ խաղաղության համաձայնագիրը կստորագրվի մոտ ապագայում։
«Արմենպրես»-ի հաղորդմամբ՝ այս մասին Վրաստանի նախագահ Միխեիլ Կավելաշվիլին հայտարարել է Հայաստանի Հանրապետության նախագահ Վահագն Խաչատուրյանի հետ հանդիպումից հետո մամուլի համար հայտարարության ժամանակ։
«Վրաստանը միանշանակորեն ողջունում է Հայաստանի և Ադրբեջանի 2025 թվականի մարտի 13-ի հայտարարությունը՝ խաղաղության համաձայնագրի պայմանների շուրջ բանակցությունների ավարտի վերաբերյալ։ Մենք կարծում ենք, որ սա կարևոր գործընթացի սկիզբն է, որը պահանջում է հետագա համատեղ ջանքեր խաղաղ, անվտանգ, կայուն և զարգացած Հարավային Կովկասի տարածաշրջան ստեղծելու համար։ Հույս ունենք, որ Հայաստանն ու Ադրբեջանը մոտ ապագայում կստորագրեն խաղաղության համաձայնագիրն ու դրանով իսկ Հարավային Կովկասում դրական զարգացման դինամիկան և տարածաշրջանի գրավչությունը կբարձրանա»,-ընդգծել է Վրաստանի նախագահը։
Միխեիլ Կավելաշվիլին նաև նշել է, որ Հայաստանի նախագահի հետ հանդիպման ընթացքում անդրադարձ է կատարվել 2025 թվականի ապրիլի 17-ին Հայաստանի, Վրաստանի և Ադրբեջանի արտաքին գործերի փոխնախարարների միջև Թբիլիսիում կայացած եռակողմ հանդիպմանը, որը, Վրաստանի նախագահի բնորոշմամբ, Հարավային Կովկասի երկրների միջև եռակողմ փոխշահավետ համագործակցության գործընթացի սկիզբն է։
«Վրաստանն անսասանորեն հանձնառու է Հարավային Կովկասում խաղաղության և կայունության հաստատման գործընթացին։ Մենք պատրաստ ենք խորացնել տարածաշրջանային համագործակցությունը բոլոր ուղղություններով և նպաստել արդար ու խաղաղ բազմաբևեռ միջազգային կարգի ձևավորմանը»,-ասել է Միխեիլ Կավելաշվիլին։