Պուտինը Սաուդյան Արաբիայի թագաժառանգին շնորհակալություն է հայտնել ՌԴ-ի և ԱՄՆ-ի բանակցությունների համար
2 րոպեի ընթերցում
ՌԴ նախագահ Վլադիմիր Պուտինը հեռախոսազրույց է ունեցել Սաուդյան Արաբիայի թագաժառանգ, նախարարների խորհրդի նախագահ Մուհամեդ բեն Սալման ալ Սաուդի հետ: «Արմենպրես»-ի փոխանցմամբ՝ այս մասին հաղորդում է Կրեմլի մամուլի ծառայությունը։
«Ռուսաստանի նախագահը բարձր է գնահատել Սաուդյան Արաբիայի միջնորդական ջանքերը, շնորհակալություն հայտնել, մասնավորապես, փետրվարի 18-ին Էր Ռիադում Ռուսաստանի և ԱՄՆ-ի ներկայացուցիչների բանակցությունների անցկացման համար բարենպաստ պայմաններ ստեղծելու համար», - ասվում է հաղորդագրության մեջ։
Իր հերթին, սաուդցի թագաժառանգը հայտնել է ռուս-ուկրաինական հակամարտության կարգավորման կարևորության մասին և պատրաստակամություն հայտնել աջակցելու Ռուսաստանի և ԱՄՆ-ի հարաբերությունների կարգավորմանը։
«Երկու կողմից գոհունակությամբ արձանագրվել է ռուս-սաուդյան համագործակցության բարձր մակարդակը և հաստատվել տրամադրվածությունը բարեկամական ու կառուցողական ոգով դրա հետագա զարգացման հարցում», - ամփոփել են Կրեմլում։
Բացի այդ, Ռուսաստանը և Սաուդյան Արաբիան հաստատել են «ՕՊԵԿ+»-ի շրջանակներում պարտավորությունների պահպանումը։
«Քննարկվել են «ՕՊԵԿ+»-ի շրջանակներում ռուս-սաուդյան փոխգործակցության հրատապ հարցեր: Ընդգծվել է այս եզակի ձևաչափի կարևորությունը նավթի համաշխարհային շուկայի կայունության ապահովման, առաջարկի և պահանջարկի միջև հավասարակշռության պահպանման համար՝ ի շահ հումք արտադրողների ու սպառողների: Շեշտը դրվել է Ռուսաստանի և Սաուդյան Արաբիայի հանձնառության վրա՝ պահպանելու «ՕՊԵԿ+»-ում ստանձնած պարտավորությունները»,- ասվում է Կրեմլի հաղորդագրության մեջ։