2 րոպեի ընթերցում
Հայաստանի Աշոցք բնակավայրում կգործի ձմեռային մարզաձևերի ակադեմիա, որը կնպաստի ձմեռային մարզաձևերի առավել մասսայականացմանն ու պրոֆեսիոնալ մարզիչների կայացմանը:
«Արմենպրես»-ի հետ զրույցում Հայաստանի դահուկասպորտի ֆեդերացիայի նախագահ Գագիկ Սարգսյանը ներկայացրել է նախաձեռնության մանրամասները:
«Ֆեդերացիայի երկար տարիների աշխատանքն ու փորձը բերեց այս ակադեմիայի ստեղծմանը: Մի քանի հանգամանք կար: Դրանցից մեկը որակյալ կադրերի պատրաստումն էր, որի «դպրոցը» մենք չունեինք, ժամանակակից սպորտում առկա պահանջները բավարարող ուսում չունեինք»,-առանձնացրեց Սարգսյանը:
Վերջինս շեշտեց, որ ակադեմիայի ստեղծման համար հիմք է ընդունվել նորվեգական ձմեռային դպրոցի փորձը, քանի որ տարիներ առաջ Նորվեգիան իր հիմնական մարզաձևում` դահուկասպորտում, լճացման էր հասել: Սկանդինավյան այդ երկրում սկսել են մարզաձևին նոր ավյուն տալ հենց ակադեմիաների նոր ձևաչափի միջոցով:
«Մենք ուսումնասիրել ենք նաև ամբողջ աշխարհի փորձը, որ վերաբերում է դահուկային ձևերին: Հենց այդ ուսումնասիրությունը մեզ համար լիուլի բավարար էր մեր մտածելակերպին մոտ ծրագիր ստեղծելու համար: Մեր ակադեմիայի ամբողջ մշտադիտարկումը իրականացվելու է նորվեգացի մասնագետների կողմից»,-ասաց նա:
Ֆեդերացիան նպատակ ունի ակադեմիայի ծրագրերը արտոնագրել թե՛ Հայաստանում, թե՛ միջազգային համապատասխան կառույցներում: Ֆեդերացիան ծրագրի շրջանակներում կրթություն ստացող մարզիչների համար կհամագործակցի նաև Հայաստանի ազգային օլիմպիական կոմիտեի հետ: