Թուրքիայի իշխող կուսակցությունը դիտարկում է Էրդողանի առաջադրումը 2027 թվականի ընտրություններին
2 րոպեի ընթերցում
AK PARTİ GENEL BAŞKAN YARDIMCISI HÜSEYİN YAYMAN, (VEYSEL KORKMAZ/HATAY-İHA)
Թուրքիայի իշխող «Արդարություն և զարգացում» կուսակցության փոխնախագահ Հուսեյն Յայմանը հայտարարել է, որ կուսակցությունը դիտարկում է նախագահ Ռեջեփ Թայիփ Էրդողանին 2027 թվականի նոյեմբերին կայանալիք նախագահական ընտրություններում կրկին առաջադրելու հեռանկարը։ «Արմենպրես»-հաղորդմամբ՝ այս մասին հայտնում է IHA գործակալությունը։
«Այլ թեկնածուի կարիք չկա։ Հաջորդ ընտրություններում մենք մեր նախագահին կրկին երկրի ղեկավար կդարձնենք»,- ասել է նա Անթալիայում ԱԶԿ անդամների հետ հանդիպմանը։
Նա նշել է, որ Էրդողանի թեկնածությունը կառաջադրի Ժողովրդական դաշինքը, որի կազմում են ԱԶԿ-ն և «Ազգայնական շարժում» կուսակցությունը։
Փետրվարի վերջին «Türkiye» թերթը, վկայակոչելով ԱԶԿ-ի ներքին կուսակցական քննարկումները, հայտնել էր, որ իշխող կուսակցության անդամները ոչ պաշտոնապես քննարկում են 2027 թվականի աշնանը արտահերթ նախագահական և խորհրդարանական ընտրություններ անցկացնելու տարբերակը։ Նշվում է, որ քվեարկությունը հետաձգելու պատճառը ԱԶԿ-ի մտադրությունն է՝ կրկին Էրդողանին առաջադրել որպես բարձրագույն պաշտոնի թեկնածու։ Թուրքիայի սահմանադրության համաձայն՝ 2028 թվականին, երբ նախատեսվում են ընտրություններ, նա այլեւս չի կարողանա առաջադրվել նախագահի պաշտոնում, սակայն արտահերթ ընտրությունների դեպքում նա կունենա այդ իրավունքը։
Ավելի վաղ ընդդիմությունը կոչ էր արել իշխանություններին որոշում կայացնել 2025 թվականին արտահերթ ընտրությունների վերաբերյալ։ Մինչդեռ արտահերթ ընտրությունների մասին որոշումը կյանքի կոչելու համար անհրաժեշտ է խորհրդարանի համապատասխան սանկցիա։ Ներկայում ԱԶԿ-ն և նրա դաշնակից «Ազգայնական շարժում» կուսակցությունը չունեն բավարար ձայներ՝ խորհրդարանի միջոցով վաղաժամկետ քվեարկության վերաբերյալ բանաձեւ ընդունելու համար։ Դրա համար անհրաժեշտ է նվազագույնը 360 ձայն: Ընդդիմությունը նույնպես բավարար մանդատ չի ունենա.
Պաշտոնապես ԱԶԿ-ն ու երկրի ղեկավարությունը ներկայումս հայտարարում են, որ արտահերթ ընտրությունների հարցը օրակարգում չկա։